Tgi chatta in vaccin? Cura è il vaccin pront? Questas dumondas fatschentan da preschent la publicitad. Ma la gronda sfida cumenza forsa pir, cura ch’il vaccin vegn sin il martgà, di Seraina Gross da la Handelszeitung. En quel mument dettia quai in tarment chatsch sin quest vaccin.
Forsa ston ins virolar milliardas d'umans?
Las dumondas cardinalas sajan lura:
- Co dar dumogn da producir avunda vaccin?
- Tge custa il vaccin?
Pretschs sco per medicament da HIV?
La reputaziun da la farmazia aveva patì cun chareschia medicaments cunter HIV. Pajais paupers n'avevan betg pudì cumprar quests medicaments.
Che quai sa repetia cun il vaccin cunter il coronavirus na po Seraina Gross betg s'imaginar. In'interpresa da farma na possia betg sa lubir da far pretschs che mo l'Europa e l'USA possian pajar.
Tuts sesan en la medema bartga e vulan cumbatter la pandemia.
Il squitsch public ed il squitsch dals stadis vegnia ad esser fitg grond da metter a disposiziun il vaccin a moda favuraivla.
14 concerns collavuran
Entras in'iniziativa da la Bill e Melinda Gates Fondation collavurian uss 14 concerns farmaceutics che concurrenzeschian uschiglio in l’auter, di Seraina Gross.
Ils concerns s'obligheschian da collavurar en il cumbat cunter covid-19 – per exempel cura ch'i dat in vaccin. Gia uss sa preparian quests concerns da metter a disposiziun capacitads per producir avunda vaccin.