Jon Domenic Parolini vesa tar la magistraglia in ristg ch'els s'infecteschan durant la lavur. Lura stoppian ins serrar las scolas. Per evitar quai, vuless il minister d'educaziun ch'era magistras e magisters vegnan vaccinads cun prioritad. L’Uffizi da sanadad BAG n’ha actualmain betg priorisà la magistraglia.
LEGR na prenda betg posiziun
La dumonda è dentant era, sche scolastas e scolasts fissan insumma pronts da sa laschar vaccinar. L’uniun da las scolastas e scolasts na vul betg prender posiziun generalmain tar quest tema. La presidenta da l'uniun manegia:
Quai è in tema fitg sensibel.
Ella beneventass da principi, sche scolastas e scolasts survegnissan la pussaivladad da laschar vaccinar pli baud. Ina vaccinaziun stoppia dentant restar facultativa. Mintga persuna d’instrucziun duai decider sezza, sch'ella vul ina vaccinaziun u betg.
Per il mument hai num «mascrinas e testar»
Sco med cunter la derasaziun datti il mument surtut la mascrina. En il Grischun vala l’obligatori da mascrina davent dal stgalim superiur. Auters chantuns han quest obligatori gia en la scola primara e schizunt scolina. Quai na vul la LEGR betg. In obligatori en las classas autas da la primara fissi dentant imaginabel.
In auter med per segirar il manaschi da scola sajan ils tests da corona. Tant il minister d'educaziun sco er la presidenta da la magistraglia Grischuna sustegnan tests da massa.