Siglir tar il cuntegn

Header

Cudeschet da vaccinaziuns ensemen cun ina squitta da vaccin en ils mauns d'in medi.
Legenda: Anc han ils pli blers la varianta da palpiri da l'attest da vaccinaziun. SRF
cuntegn

Vaccinar cunter corona Co è quai puspè cun l'attest da vaccinaziun?

Gea er la vaccinaziun cunter corona tutga sco p. ex. quella cunter FSME u il virustgel en l'attest da vaccinaziun. Ma tge far, sch'ins na chatta betg pli l'attest? E co guarda quai atgnamain ora cun las autras vaccinaziuns – tgeninas èsi tut tenor da rinfrestgar?

Dapi il 2011 datti la pussaivladad da far in attest da vaccinaziun electronic. Quai sin la pagina www.meineimpfungen.ch, il link avra en ina nova fanestra. Quel pon ins era crear, sche l'attest en furma da palpiri n'è betg pli da chattar.

Cun respunder ad intginas dumondas èsi pussaivel da reconstruir il pli impurtant davart las atgnas vaccinaziuns. Quai dovra però in zic temp e pazienza. Sin la pagina datti in manual da 38 paginas che declera pass per pass tge ch'ins po far e co. Uschiglio pon er il medi u l'apotecra gidar.

Anc betg uschè popular

Malgrà che l'attest electronic porscha avantatgs sco per exempel ina funcziun che regorda ins, sch'igl è da rinfrestgar in vaccin u er simplamain la pussaivladad d'arcunar las infurmaziuns, uschia che quellas na pon betg ir a perder, n'è la varianta electronica anc betg propi derasada. Quai er sch'ella exista gia dapi bunamain 10 onns. Tenor il Beobachter eran sa registradas fin l'onn 2019 bun 235'000 persunas – var 9'000 da quellas eran persunas dal fatg sco medias ed apoterchers.

Sco raschuns inditgeschan, tant ils iniziants sco er medis, ch'i saja anc pulit cumplitgà. Da vart da l'attest electronic fiss la funcziunalitad dada da sa colliar cun ils sistems electronics da medias e medis. Da lur vart stuessan quests sistems però vegnir actualisads, per pudair nizzegiar quella colliaziun. Qua na saja anc betg marschà propi bler.

Tenor la strategia da sanadad da la Confederaziun è l'attest da vaccinaziun electronic part dal dossier da pazients electronic, il link avra en ina nova fanestra. Quel è vegnì lantschà en ospitals e clinicas l'entschatta 2020 e cuntinuescha ils proxims onns.

Tge vaccinaziuns laschar rinfrestgar?

  • FSME – per creschids mintga 10 onns
  • Difteria e tetanus – mintga 20 onns ed a partir da 65 onns, mintga 10 onns
  • Hepatitis B – rinfrestgar sco creschì/-da
  • Paralisa d'uffants – tar viadis en lieus da ristg

La survista n'è betg cumpletta. I dependa er tge vaccinaziuns ch'ins ha gia survegnì e vegn categorisà tenor vaccinaziuns da basa, supplementaras u per territoris/situaziuns da ristg. Dapli infurmaziuns datti er sin la plattafurma d'infurmaziun davart vaccinaziuns, il link avra en ina nova fanestra.

RTR actualitad 08:00

Artitgels legids il pli savens

Scrollar a sanestra Scrollar a dretga