Siglir tar il cuntegn
Inhalt

Chantun Ventschida da la praschun a Cazas

La construcziun da la nova praschun a Realta, Cazas è sin buna via. Suenter bun in onn stettian ils mirs ed ils tetgs spundivs. Quai scriva la regenza grischuna. Radund 200 persunas sajan sa participadas a la festa da ventschida tradiziunala.

En la planisaziun da la praschun vegnian adina puspè resguardadas novas enconuschientschas e novaziuns tecnicas. Uschia duai il bajetg correspunder a sia avertura il 2019 als basegns actuals da l'execuziun dal chasti. El porscha plaz a radund 152 praschuniers. Ils custs da construcziun muntan a 119 milliuns francs ed ins saja sin buna via da tegnair en ils custs.

Lavurs pretensiusas vid la construcziun criva

Per la consctrucziun criva sajan vegnids duvrads 14'000 meters cubic betun da construcziun e 1'300 tonnas atschal. Ils blers elements dal bajetg ed era ils divers implants tecnics e da segirezza han stuì vegnir montads tuts en il dretg temp. Quai ha engrevgià las lavurs als installaturs.

Ils tetgs consistan d'elements da lain prefabritgads. Las stanzas gist sut il tetg èn previsas per ils implants tecnics da las chasas. Pervi dal livel da l'aua sutterrana fitg aut han ins desistì da bajegiar sutterran, quai che fiss stà collià cun custs auts.

Nagin po fugir, ma er nagin po guardar viaden

L'element essenzial dal perimeter da segirezza ordadora è il mir da set meters autezza e 950 meters lunghezza. Il mir è vegnì bajegià cun ina spertadad da 12,5 meters a di, quai ch'è fitg svelt. Cun il mir duai per l'ina vegnir segirà che nagin po fugir, ma era vegnir protegì da la vista d'ordadora. Per ch'il mir giaja a prà meglier cun il conturn è il betun vegnì colurà.

Effizienza d'energia malgrà aut standard da segirezza

En la praschun da Cazas vegn resguardà il standard da minergia, malgrà il standard aut da segirezza ch'è necessari. En acziun vegnan materialias ch'èn simplas da mantegnair e che tegnan ditg. Sche pussaivel vegn era duvrà lain per la construcziun. Grazia a differentas mesiras, sco il diever da glischs da LED, sco er tar la coordinaziun cun las funcziuns automaticas da la chasa cun glisch e sumbriva, tar il stgaudament e la ventilaziun, en cuschina ed en lavandaria, vegn il diever d'energia reducì sin il minimum. In aut grad da l'atgna producziun d'energia cun cellas solaras augmenta anc questa effizienza.

RR novitads 14:00