Siglir tar il cuntegn

Chantun Vespras pon era esser in avantatg

Uschè bleras vespras sco dapi passa 15 onns betg pli en il Grischun. Per ils ins in problem, per ils auters in plaschair.

Dr. Ueli Rehsteiner vesa era blers avantatgs tar las vespras.
Legenda: Dr. Ueli Rehsteiner vesa era blers avantatgs tar las vespras. RTR, Gian-Marco Maissen

Las vespras valan sco agressivas e privlusas. Dentant na constettia quai betg dal tut, manegia il biolog e directur dal museum da natira grischun Dr. Ueli Rehsteiner. La vespra n’attatgia betg simplamain uschia. Sche lura mo perquai ch’ella haja tema u sa sentia en privel. Ed ella piztga era pli darar che savens pensà. Era na parta el betg l’opiniun che mintga vesprer stoppia vegnir davent. Per pli funcziunia ina convivenza tranter uman e vespra senza problem. Ins stoppia simplamain emprender dad ir enturn cun l'animal.

Persuenter maglian vespras blers auters insects, uschia ch’ins ha persuenter pli paucas mustgas en il conturn. Natiralmain dettia quai era lieus u situaziuns nua ch’ina convivenza tranter uman e vesprer na giaja betg, dentant sajan quai plitost ils paucs cas.

Blera lavur per las firmas che allontaneschan vesprers

Ina firma da Domat che allontanescha vesprers conferma sin dumonda da RTR ch'els hajan il mument fitg bler da far. Uschia hajan els gist il dubel uschè bleras incumbensas sco en auters onns. En cifras vul quai dir 5-8 vesprers per di. Uschè in’auta frequenza hajan els gì la davosa giada la stad chauda dal 2003.

RR actualitad 08:00