Siglir tar il cuntegn

Header

Navigaziun

cuntegn

Chantun Viafier retica e Stadler Rail han preschentà il «Capricorn»

Stadler bajegia en tut 36 da quests trens cun in accuplament automatic. Cun quels po la Viafier retica realisar in tact d'ina mes'ura sin tscherts trajects cun mo in binari. Igl è la pli gronda acquisiziun da material rudlant che la Viafier retica ha fatg en sia istorgia.

Ils emprims trens dal tip Capricorn duain vegnir en funcziun la fin d'atun 2019. Quai sin il traject da Landquart-Tavau-Filisur. A partir dal 2021 duain ils trens charrar tranter Landquart-Claustra-Tavau/San Murezzan. Er en Surselva duain ils trens la finala vegnir. Cun quests novs trens vul la Viafier retica daventar pli effizienta. Uschia po la viafier numnadamain realisar in tact da mes'ura sin il traject da Landquart a Claustra e quai senza stuair schlargiar la rait sin duas rodaglias.

Il principi dal tren ad autotracziun accuplabel

Tar il traffic cun ils trens ad autotracziun accuplabla vai per nagut auter che quai ch'ins po parter ils trens sin viadi. Quai munta ch'ins po separar dus tocs dal tren in da l'auter a moda automatica e lura charrar enavant be cun ina part u cun duas parts en duas differentas direcziuns. Cun quai vegn spargnà bler temp ch'ins ha duvrà fin uss per mintgamai distatgar la locomotiva dal tren, ir cun quella da l'autra vart dals vaguns, puspè pender tiers ella e lura puspè charrar enavos.

Signalament

  • 361 milliuns francs
  • 164 sezs confortabels (da quai 35 en 1. classa)
  • bischlas da contact en tut ils vaguns
  • transmissiun da la vista da la locomotiva en ils vaguns
  • fanestras pon vegnir avertas en tut ils vaguns
  • avunda plaz per skis, valischs, e bikes
  • spertadad da max. 120 kilometers l'ura
  • adattà per persunas cun impediments (tualettas, plazzas per sutgas cun rodas, e scrittira tactila)

TR Telesguard 17:40.