Viafier retica ha beneventà dapli passagiers

L’optimissem regia tar la Viafier retica: Suenter in difficil onn passà quinta ella cun in resultat positiv per il 2016. Ils emprims 10 mais ha l’interpresa nudà 1,9% dapli passagiers cumpareglià cun la medema perioda dal 2015. Quai ha annunzià la Viafier retica a sia conferenza da medias annuala.

Laschar ir video «La pitschna cotschna fa cifras nairas»

La pitschna cotschna fa cifras nairas

2:31 min, Telesguard dals 12.12.2016

L’onn 2015 aveva la Viafier retica anc nudà in minus da 4,5% tar ils passagiers. L’onn actual para da daventar in meglier: Sco l'interpresa da transport scriva haja ella fin la fin d'october nudà passa 8,6 milliuns passagiers (+1,9% u ca. 160’000 passagiers).

Dapli passagiers haja la «pitschna cotschna» cunzunt transporta sin ils suandants trajects:

  • sur il Bernina
  • tranter Landquart e San Murezzan, via Vereina
  • tranter Landquart e Tavau
  • tranter Tusaun e Schiers (trens da pendularis)

Differents projects sin buna via

Ils ultims onns ha la Viafier retica investì en numerus projects. E quels fan progress, sco l’interpresa scriva.

Uschia è la construcziun dal nov tunnel da l’Alvra dapi ils 10 da november 2016 en ina fasa decisiva – la perfuraziun da la zona da disturbi geologica «Raibler Rauwacke». Quella duai esser cumpletta vers schaner 2017.

Plinavant sin buna via saja er la modernisaziun da las staziuns a San Murezzan, Glion e Poschiavo. Dapli detagls tar projects e custs da la Viafier retica chattais en la tabella sutvart.

Survista d'investiziuns da la Viafier retica

Projects tranter 2014 e 2022 (betg cumplet)
Project
Summa en CHF
Staziun Poschiavo, renovaziun
35,6 miu.
Staziun San Murezzan, renovaziun
66 miu.
Staziun Glion, renovaziun
30 miu.
Staziun Tavau Plaz, renovaziun
42 miu.
Tunnel da l'Alvra, nova construcziun
56 miu. (2015)
36 novs trens ad autotracziun
356 miu.
6 novas cumposiziuns da tren per la lingia d'Alvra
124 miu.
Mantegniment da tunnels
34 miu. / onn
Vehichel da pumpiers per binaris, nov acquist
6 miu.
Viaduct da la Landwasser, rinforzament
240'000


Projects tranter 2014 e 2022 (betg cumplet)
Funtaunas: Pagina web Viafier retica / archiv RTR

RR novitads 11:00