Siglir tar il cuntegn

Header

Sch'ins dauda ord l'abitaziun dals vaschins cloms d'agid u ramurs che inditgeschan violenza, èsi immediat da clamar la polizia.
Legenda: Sch'ins dauda ord l'abitaziun dals vaschins cloms d'agid u ramurs che inditgeschan violenza, èsi immediat da clamar la polizia. Schweizerische Kriminalprävention
cuntegn

Violenza a chasa Co mitschar?

Sa deliberar da la violenza a chasa n’è betg simpel. I dovra agid professiunal. Dunnas pertutgadas pateschan savens onns a la lunga.

Tal agid porscha l’Agid da victimas dal Grischun, 081 257 31 50. Tge cussegl survegn ina dunna, sch’ella telefonescha l’emprima giada sin quest numer?

audio
Co reusseschi a pertutgadas da mitschar?
03:27 min, Actualitad dals 23.11.2020.
laschar ir. Durada: 03:27 minutas.

Privel acut

Tar l’emprim telefonat fetschian ins ina valitaziun da ristg, di Bettina Melchior, manadra da l’Agid da victimas. Sch’ina dunna e ses uffants sa chattian en privel acut, stoppia vegnir alarmada la polizia u ch’ins procuria per albiert en la chasa da dunnas.

Normalmain ageschian ins dentant pli plaun e cun tutta precauziun. Ins veglia evitar da destabilisar lur situaziun cun in’intervenziun.

Nus na dain betg immediat cussegls, mabain prendain peda da tadlar
Autur: Bettina Melchiormanadra dal Agid da victimas dal Grischun

Ins emprovia l’emprim da chapir en tge situaziun ch’ina dunna sa chattia: Tge ha ella fatg atras? Co è sia situaziun famigliara? Tge less ella cun ses telefonat? Suenter stoppian ins agir cun precauziun, di la manadra da l’Agid da victimas.

Impurtant saja da dar segirtad a las dunnas pertutgadas da violenza – savens era cun ina terapia – e lura ponderar ensemen cun ellas ils pass necessaris. Sortir dal circul vizius da violenza dovria agid professiunal, di Bettina Melchior. E savens sa tractia quai d’in lung process.

Avant dretgira

audio
L'aspect giudizial en l'intervista cun Susanna Mazzetta
10:18 min, RTR Audio dals 23.11.2020.
laschar ir. Durada: 10:18 minutas.

Tar quest process tutga per mammas maridadas er il divorzi e da reglar ils dretgs da visita tranter bab ed uffants. L’advocata Susanna Mazzetta posseda blera experientscha cun defender ils dretgs da dunnas pertutgadas. Ina mediaziun na portia en tals cas per il solit nagut ed i dovria ina decisiun da la dretgira.

In cumbat giuridic n’è mai simpel e sch’i va per violenza a chasa batta ina dunna avant dretgira per il solit cunter il bab dals agens uffants. È quai in obstachel?

Ils uffants sajan adina pertutgads da la violenza a chasa, er sch’els survegnian betg sezs fridas, di l’advocata. Las mammas veglian procurar ch’er ils uffants mitschian da questa situaziun.

Ils uffants dattan a las dunnas il curaschi dad ir avant dretgira
Autur: Susanna Mazzettaadvocata

Per las dunnas pertutgadas saja la part civila pli impurtanta en in process giuridic. Là decidia la dretgira davart il divorzi, tar tgi ch’ils uffants vivian, tgi che restia en l’abitaziun ed il dretg da contact – pia co vai vinavant. Quai haja dapli paisa.

La vart penala – vul dir da chastiar la persuna violenta – n’haja en la vita da mintgadi da las dunnas betg in'impurtanza uschè gronda.

16 dis cunter violenza

Avrir la boxSerrar la box

Ils 25 da november è il di internaziunal «violenza cunter dunnas». Quel di cumenza la campagna svizra cunter violenza a chasa.

La campagna dura 16 dis e fa attent che dunnas e mammas èn periclitadas pervi da corona anc pli fitg ch’auters onns. La pandemia sforza da restar a chasa ed en famiglias cun problems da violenza s’accentuescha la situaziun.

En il Grischun sa fatschentan differentas organisaziuns durant quels 16 dis cun la violenza cunter uffants e giuvenils. Il program chattan ins qua, il link avra en ina nova fanestra.

RTR actualitad 08:00

Artitgels legids il pli savens

Scrollar a sanestra Scrollar a dretga