Las autoritads grischunas èn sa scuntradas glindesdi per giuditgar la situaziun actuala pertutgant il virus da Corona. En Svizra ed uschia er en il chantun Grischun na saja fin uss anc vegnì cumprovà nagin cas. Dentant saja il Grischun preparà per prender mesiras. Quai ha communitgà l'Uffizi da sanadad.
Ils ospitals èn preparads. Ins na dastga betg emblidar: la finala è la malsogna sumeglianta ad ina grippa.
Il manader da l'Uffizi da sanadad dal Grischun, Rudolf Leuthold, ha discutà cun la media chantunala, Marina Jamnicki, e cun las manadras ed ils manaders dals posts da servetsch davart il svilup il pli nov en connex cun il virus da Corona. Il svilup dal virus vegnia persequità e valità d'in cuntin.
Uschia sco il virus sa derasa il mument èsi mo ina dumonda dal temp enfin ch'ì dat l'emprim cas en il chantun Grischun.
Cas datiers dal cunfin
Il chantun Grischun è vegnì activ en il cas da virus da Corona datiers dals cunfins grischuns. Radund ina mes'ura davent dal Puschlav è in giuven s'infectà cun il virus da Corona. La persuna vegn il mument tgirada en l'ospital da Sondrio.
RTR novitads 12:00+