Siglir tar il cuntegn

Header

cuntegn

Vischnancas Decisiuns en vischnancas grischunas

  • Vopna da Glion.
    Legenda: Ilanz/Glion RTR

    Ilanz/Glion

    Cun prest 54% da las vuschs ha la vischnanca da Ilanz/Glion decidì d'approvar la nova lescha da bajegiar. Quella duai unir las 13 differentas leschas da fin qua.

  • Vopna da Tavau.
    Legenda: Tavau RTR

    Tavau

    La vischnanca da Tavau ha decidì da sustegnair l'ospital da Tavau. Qua vai per l'ina per gidar da finanziar las spartas che na rendan betg; la staziun d'urgenza, la staziun da ginecologia / l'agid da parturir ed il servetsch da salvament. Il suveran ha perquai gì da decider davart ina contribuziun annuala da mintgamai radund 1,2 milliuns francs. Plinavant surpiglia la vischnanca dus emprests dal chantun per total 5,8 milliuns francs. –– Il dretg da votar per persunas da l'ester che vivan dapi almain 5 onns a Tavau ha fatg naufragi, cun 61% da las vuschs che han ditg NA. –– Il terz project pertutga la nova reglamentaziun da reclama en il spazi public. La nova lescha da construcziun ha il suveran approvà cun radund 80%.

  • Vopna da Cuira.
    Legenda: Cuira RTR

    Cuira

    Las votantas ed ils votants da Cuira han approvà da barattar il terren tranter la citad e la vischnanca burgaisa, quai per che la caserna da l'armada a Cuira possia vegnir spustada. Ì èsi per ina summa da 7,1 milliuns francs. Il terren nua che la caserna veglia sa chatta duai vegnir nizzegià sco spazi d'abitar, lavurar e per il diever public. –– Ultra da quai ha la citad decidì d'approvar la fusiun cun Haldenstein. A Haldenstein aveva il suveran gia approvà la fusiun il november. Quai però be cun ina differenza da duas vuschs. –– En pli ha il suveran approvà in contract da dretg da construcziun cun la fima Immobilien Trist Chur AG. Quella vul realisar in project cun spazi per abitaziuns e butias.

  • Vopna da Landquart.
    Legenda: Landquart RTR

    Landquart

    Il president communal da Landquart Sepp Föhn, è reelegì per in'ulteriura perioda d'uffizi. El è stà il sulet candidat uffizial per quest post. Gia avant quatter onns era il politicher da la PCD vegnì reelegì senza cuntracandidatura. Sepp Föhn è dapi l'onn 2015 president communal.

  • Vopna da Lumenzia.
    Legenda: Lumnezia RTR

    Lumnezia

    Las Lumnezianas ed ils Lumnezians han approvà dus projects. Il provediment d'aua dal vitg da Lumbrein ha il suveran approvà cun 87% da las vuschs. La sanaziun custa 2,1 milliuns. I sa tracta da las emprimas duas etappas. –– L'auter project pertutga ils stabiliments da la scola Vella che ston vegnir sanadas. Quest project è vegnì approvà pli stretg cun 57% da las vuschs, per dar il credit da 3,67 milliuns francs. En quel è era cumpiglià in indriz fotovoltaic che duai vegnir installà sin dus dals bajetgs da la scola.

  • Vopna da Tusaun.
    Legenda: Tusaun RTR

    Tusaun

    A Tusaun po vegnir sanada l'ultima etappa da la via sut la staziun – la via Compogna. Il suveran ha dà ses consentiment per ils 1,28 milliuns francs, quai cun prest 90% da las vuschs. Las emprimas duas etappas èn gia vegnidas realisadas durant ils ultims dus onns.

  • Vopna da Schiers.
    Legenda: Schiers RTR

    Schiers

    Cun 57% ha il suveran da Schiers decidì in GEA per la nova lescha per taxas d'alloschament. Quella remplazza la taxa da giasts u da cura da fin qua. Da nov na vegn la taxa betg pli calculada sin basa dal dumber dals giasts, mabain sin basa dal dumber da chombras (d'hotel) u da la surfatscha da l'abitaziun da vacanzas.

  • Vopna da Lantsch.
    Legenda: Lantsch RTR

    Lantsch

    Il suveran da Lantsch ha approvà in credit da 5,5 milliuns francs per sanar lingias d'aua persa e la via pertutgada, quai cun 87% da las vuschs valaivlas. I sa tracta da las 3 ulteriuras da 5 etappas da sanaziun.

  • Vopna da Arosa.
    Legenda: Arosa RTR

    Arosa

    Las votantas ed ils votants dad Arosa han approvà cun prest 71% la meglieraziun generala da las duas anteriuras vischnancas da Castiel e Langwies.

RTR votaziuns 12:00+