Cun las duas candidaturas da St. Antönien e Lavin, Guarda ed Ardez duain ils «Vitgs d'alpinists» uss er vegnir lantschads en Svizra. Il project ch'è vegnì lantschà il 2008 en l'Austria cumpiglia gia 29 vitgs en l'Austria, Germania, Italia e Slovenia. Il label stat cunzunt per persistenza e per in turissem miaivel, uschia Marc Bless, il manader dal project da pilot en Svizra.
Ruassaivladad enstagl da hectica, quai è dumandà. Vitgs autentics cun tradiziun e cultura locala, quai fa or il label.
Ils vitgs St. Antönien e Lavin, Guarda ed Ardez sajan predestinads per quest label e vivian gia uss in turissem persistent datiers da la natira. E perquai è Marc Bless er optimistic ch'ins survegnia er il label la fin da november a la sesida internaziunala dals «Vitgs d'alpinists». Uschia ch'ils vitgs pon lura suenter er profitar da la fasa da pilot che duai cuzzar trais onns e che vegn tranter auter er finanziada da chantun e Confederaziun. Totalmain stattan a disposiziun per la fasa da pilot 450'000 francs.