PLD Grischun: direcziun generala decida parolas
Pervi da las circumstanzas entras la pandemia ha la direcziun da la Partida liberal-democratica dal Grischun decis da laschar crudar la radunanza da delegadas e delegads e cunquai da decider excepziunalmain sezza las parolas da votaziun. Uschia di la PLD grischuna Na a l'iniziativa per scumandar da cuvrir la fatscha. Gea a la lescha davart l'e-ID e Gea a la cunvegna economica tranter ils stadis da l'EFTA e l'Indonesia. Tuttas parolas correspundan a quellas da la partida mamma.
PPS Grischun: Duas giadas Gea
La secziun grischuna da la Partida populara svizra ha decis duas giadas la parola Gea en vista a las votaziuns dals 7 da mars. Unanimamain di la PPS grischuna Gea a l'iniziativa davart il scumond da cuvrir la fatscha ed er Gea a la cunvegna economica tranter ils stadis da l'EFTA e l'Indonesia. Sulet la decisiun da questas duas parolas steva sin la glista da tractandas da la radunanza da partida virtuala.
