I saja gist anc baud avunda per avair tactica e posiziunar candidaturas, hai num en tut ils discurs cun politicras e politichers. Sur stad pir s'inscuntran las partidas en clausuras e fan sesidas per zambregiar vid la meglra strategia.
Cler para sulet: Il minister da traffic Mario Cavigelli (PCD) ed il minister da finanzas Christian Rathgeb (PLD) ston chalar pervia da la limitaziun da temp d'uffizi. Dus sezs vegnan pia libers en la regenza grischuna.
La situaziun da partenza
Cler è: Ils trais cussegliers guvernativs actuals vulan vegnir reelegids l'onn proxim, quai èn: Il minister d'educaziun Jon Domenic Parolini (PBD), il minister da sanadad Peter Peyer (PS) ed il minister d'economia Marcus Caduff (PCD). Cler è dentant era: Il squitsch da la publicitad d'avair dunnas en la regenza è grond. Plinavant èn tuttas partidas grischunas en zunt interessantas situaziuns en vista a questas elecziuns grischunas.
Las partidas che han da remplazzar
La PLD sto tschertgar insatgi che vul surpigliar il sezs da Christian Rathgeb. Per ils liberaldemocrats è la dumonda schebain els vulan ir en il cumbat cun ina dunna ubain cun in um. Nums che curseschan èn: Vera Stiffler ed Urs Marti.
Pli difficila è la situaziun tar la PCD, respectiv tar la futura Allianza dal center: La partida sto sa dumandar sch'ella vul ir cun ils dus candidats vertents en la cursa ubain empruvar da salvar ils trais sezs e prender vitiers anc ina dunna. Ils arguments: Il pievel pudess valitar trais sez per la medema partida sco memia bler ed eleger be dus. La dunna – il num che cursescha è Carmelia Maissen – pudess lura far concurrenza ad in cusseglier guvernativ vertent. Probablamain a Jon Domenic Parolini, che ha gì damain vuschs l'ultima giada sco er damain preschientscha en las medias durant la pandemia che ses collega Marcus Caduff.
La terza schanza per la PPS
Cun Heinz Brand e Walter Schlegel n'hai betg funcziunà. Tge strategia ha la Partida populara dal Grischun questa giada per far il pass en la regenza? Las schanzas da dumagnar quai èn numnadamain intactas tar gist duas vacanzas. Dentant era qua è la dumonda: Tgi pudess propi far las pli bleras vuschs? Nums che curseschan èn Roman Hug e Valérie Favre Accola.
La dumonda da las dunnas
La dumonda da las dunnas pudess propi esser centrala en il cumbat electoral – in trumf per tgi che metta sin questa carta e surtut cura giugar quella. In num che cursescha sper las trais candidatas burgaisas Carmelia Maissen (PCD), Vera Stiffler (PLD) e Valérie Favre Accola (PPS) è numnadamain er quel da la cussegliera naziunala Sandra Locher Benguerel (PS).
Tuttas quatter dunnas n'han dentant anc betg decidì sch'ellas vulan candidar per la regenza, sco ellas han confermà ad RTR.
