La constituziun da la baselgia chantunala evangelica en il Grischun vegn revedida. 11 onns suenter la decisiun da reveder ella e suenter ina emprova ch'ha fatg naufragi, èsi ussa gartegià. 94% da las votantas e dals votants han ditg gea a la constituziun nova. Il president dal cussegl da la baselgia evangelica grischuna Andreas Thöny discurra d'in «top» resultat. Ins haja pudì integrar las vuschs criticas ed elavurar in project che la baselgia saja ussa preparada per las sfidas da l'avegnir.
Ils puncts centrals che vegnan midads:
- Collavuraziun tranter las plaivs e las regiuns (ils coloquis) duai vegnir rinforzada. Qua na piglia la constituziun dentant betg si insatge nov mabain insatge ch'è gia en via.
- Ils coloquis survegnan in nov num: Ellas vegnan numnadas «regiuns ecclesiasticas». Plinavant n'han quellas regiuns betg pli cunfins uschè fix. La collavuraziun u er ina fusiun fiss pussaivla er tranter plaivs da differentas regiuns.
- Ils plevons e las plevonessas ston vegnir envidads a mintga seduta da la suprastanza da plaiv. Enfin uss èn els stads commembers da la suprastanza, dentant senza dretg da vuschar.
Ina proposta per ina nova constituziun il 2011 è stada memia radicala ed i ha dà gronda resistenza, uschia ch'ins ha laschà crudar quella.
RR novitads 16:00
