I dovria mesiras extremas per ina midada en la dretga direcziun, uschia la devisa dal comité grischun per las iniziativas agraras. Davos quel stattan la Verda Grischun e diversas organisaziun per l'ambient.
Tenor Rolf Marugg da la Verda Grischun, saja uss il dretg mument per ina midada. I carstgaun haja la tendenza da reagir pir cura ch'i haja dà ina catastrofa. Els vesian a vegnir quella sch'i giaja uschia vinavant sco fin uss. Perquai saja uss il mument da midar insatge.
L'iniziativa per aua da baiver netta e l'iniziativa per ina Svizra senza pesticids sintetics duajan crear ina agricultura pli ecologica. Cun in Gea a las duas iniziativas vul il comité promover la protecziun da las auas, ils terrens, la biodiversitad e la sanadad.
L'uniun purila grischuna è gia s'exprimida encunter las iniziativas cun l'argument principal che quellas sajan memia extremas. L'organisaziun Bio Grischun sustegna però l'iniziativa per ina Svizra senza pesticids sintetics.
Ord l'archiv:
Agricultura senza pesticids: funcziuna quai? Jon Pult, cusseglier naziunal da la Partida socialdemocrata e Stefan Engler, cusseglier dals chantuns da l’Allianza dal Center discutan en il «Controvers».
Sin in clic tut las fatschentas federalas, chantunalas e communalas: rtr.ch/votaziuns
