Ina u duas linguas estras en la primara? Quai è la dumonda tar l'iniziativa dad linguas estras. I dat arguments per ed encunter. Ils aderents da l'iniziativa èn da l'avis ch'ils scolars primars èn uss surdumandads cun duas linguas estras. Ils adversaris percunter èn da l'idea che l'iniziativa è in'attatga sin l'identitad Grischuna. Cunquai ch'uffants da lingua tudestga ston be pli emprender englais en la primara. En la discussiun dad RTR èn quels ed auters arguments vegnids discutads tranter duas persunas che fissan pertutgadas directamain dal resultat: Seraina Stecher, scolasta da scola da lavur ed economia a Claustra che sustegn l'iniziativa. E Silvio Dietrich, manader da la scola da Glion, ch'ei encunter.
Jau na chapesch betg daco ch'ils rumantschs èn uschè offais dal text d'iniziativa.
Igl è da metter la paisa sin la lingua materna per che quella vegn rinforzada e sulet sin ina autra lingua, quai di Seraina Stecher. Ella è scolasta da scola da lavur e d'economia a Claustra. Cunzunt cun il plan d'instrucziun 21 hajan ils uffants gia pli che avunda da far cun auters novs roms, uschia ch'i na dovria betg anc ina ulteriura lingua estra.
Cun l'iniziativa na vegn il problem da las linguas betg schlia mabain stuschà.
Per Silvio Dietrich, manader da la scola da Glion, fissi dentant pli effizient da restar tar il sistem vertent e gia cumenzar en la primara cun linguas estras e da betg stuschar tut sin il stgalim superiur. En la primara saja saja meglier pussaivel da lavurar cun gieus u a moda lucca cun la lingua. Auter saja quai en il stgalim superiur nua ch'i dettia auters focus.
RR actualitad 11:00