Siglir tar il cuntegn

Header

audio
Aderents ed adversaris èn pronts per rimnar raps
Or da Actualitad dals 22.01.2020.
laschar ir. Durada: 03:00 minutas.
cuntegn

Iniziativa chatscha etica Rimnada da daners per las campagnas po cumenzar

L'iniziativa da chatscha speziala ha il pievel refusà la stad passada. La proxima iniziativa da chatscha vegn dentant. Aderents ed adversaris èn pronts per rimnar ils raps per lur campagnas – e quai malgrà ch'il termin da votaziun n'è anc betg enconuschent.

L'iniziativa «Per ina chatscha etica e cumpatibla cun la natira» è dapi l'onn 2018 pendent tar il Tribunal federal. Concret vai per in punct da l'iniziativa ch'è nunvalaivel. Fin che quai è sclerì n'è la data da votaziun betg enconuschenta.

Il punct dispitaivel

Personen-Box aufklappenPersonen-Box zuklappen

L'iniziativa pretenda, ch'en l'Uffizi da chatscha e pestga ston esser represchentads a moda paritetica ils protecturs d'animals/chatschaders sco era betg chatschaders. Quest punct ha sco emprim il Cussegl grond, pli tard il Tribunal administrativ chantunal declerà sco nunvavaivel. Ils iniziants han dentant tratg vinavant la decisiun tar il Tribunal federal. Quai è stà l'atun 2018. Dapi lura spetgan ins sin ina decisiun. Perquai n'è anc betg enconuschent in termin da votaziun.

50 francs da mintga chatschader

L'Uniun grischuna da chatschaders da patenta è cunter l'iniziativa. Quai ha ella schon decidì l'onn 2016 unanimamain. E sch'ils commembers sajan cunter, duessan els er pajar per la campagna, manegia il president da l'uniun Robert Brunold en la gasetta «Bündner Jäger» dal schaner.

L'iniziativa «Per ina chatscha etica e cumpatibla cun la natira»

Personen-Box aufklappenPersonen-Box zuklappen

Quest'iniziativa deriva da protecturs d'animals e vuless restrenscher la chatscha grischuna cun total nov puncts:

  • Proteger en general vatgas-tschierv e chauras-chavriel che portan ed han pitschens
  • Pausa d'enviern a partir da l'emprim da november - quai che pertutga il tschierv
  • En l'uffizi da chatscha e pestga ston esser represchentads a moda paritetica ils protecturs d'animals/chatschaders sco era betg chatschaders
  • Scumond da traplas per pigliar animals
  • Scumond da sajettar utschels
  • Limita d'alcohol analog a la lescha davart il traffic sin via
  • Controlla da l'abilitad dad ir a chatscha ed obligaziun da sajettar en l'arma, e be pli duvrar muniziun senza plum
  • Scumond per uffants sut 12 onns d'accumpagnar chatschaders
  • Tar donns extraordinaris en il guaud dastga la guardia-chatscha be sajettar animals sche tut las autras mesiras n'han betg purtà l'effect giavischà

Concret duess mintga chatschader esser obligà da pajar ina contribuziun da 50 francs. Uschia vegnissan els ensemen cun tranter 200'000 e 250'000 francs. Ch'els vegnan schon uss cun questa proposta, avant ch'il termin è cler, ha in motiv organisatoric.

Sche nus vulain raps dals commembers stuain nus decider quai a la radunanza da delegads. Quella è mo ina giada ad onn, adina il matg.
Autur: Robert BrunoldPresident Uniun grischuna da chatschaders da patenta

Sch'il Tribunal federal decidess anc quest onn fissi tut tenor memia tard, sch'els na dumandassan betg gia uss ils raps. Plans pli concrets davart la campagna n'hajan els dentant betg, di Robert Brunold sin dumonda.

Gia survegnì emprimas donaziuns

Era l'inizianta Marion Theus è pronta da rimnar raps per lur campagna. Ella haja er gia survegnì emprimas donaziuns entaifer l'uniun «Wildtierschutz Schweiz». Però grondamain a tschertgar raps giajan els pir, cura ch'il termin da votaziun saja cler.

Sche nus cumenzain memia baud na dat quai betg propi bler. [...] Nus essan dentant pronts e cumenzain subit che nus enconuschain las datas.
Autur: Marion TheusInizianta

En congual cun l'uniun da chatschaders haja ella dentant gia in sboz per la campagna. Dapli na tradescha ella dentant betg.

Cura ch'il Tribunal federal decida n'è anc betg cler. Dentant tant Marion Theus sco er Robert Brunold quintan che quai vegn anc ad esser quest onn il cas.

RTR actualitad 12:00

Dapli da Grischunavrir la Landingpage

Nach links scrollen Nach rechts scrollen