Siglir tar il cuntegn

Header

Video
La chatscha speziala datti er en futur en Grischun
Or da Telesguard dals 19.05.2019.
laschar ir
cuntegn

Iniziativa chatscha speziala Malgrà il NA – i dovria refurma

Ils aderents ed ils adversaris da l'iniziativa èn levgiads dal resultat da la votaziun. Ils adversaris perquai ch'els han gudagnà ed ils aderents, perquai ch'els hajan pudì mussar cun in resultat relativamain stretg, da 54% ch'i dovria ina refurma.

«Po betg ir enavant sco fin qua»

Il comité cunter l'iniziativa sa legra dal cler resultat da 54,2% cunter l'iniziativa per abolir la chatscha speziala. Il pievel saja s'exprimì per il sistem actual da dus stgalims cun chatsch'auta e chatscha speziala.

Nus essan engraziaivels ch'il pievel è sa decidì cler cunter experiments a donn e cust da guaud, selvaschina ed agricultura.
Autur: Tarzisius CaviezelManader da camppagna cunter l'iniziativa

Tarzisius Caviezel è dentant er da l'avis ch'i dovra ussa refurmas. Ins stoppia seser ensemen e guardar co ins possia er ir encunter als adversaris da la chatscha speziala. Ins na possia betg simplamain far enavant sco enfin qua.

«Uss sto capitar insatge»

Renatus Casutt, in dals iniziants da l'iniziativa per abolir la chatscha n'è betg trumpà dal resultat da la votaziun. Cuntrari, el è cuntent che la lavur – er cunter tuttas instituziuns uffizialas e las bleras partidas – ha pudì mobilisar tanta glieud a l'urna. Uss stoppia capitar insatge er sche l'iniziativa saja refusada. L'Uffizi da chatscha e pestga e la regenza stoppian uss reagir e ponderar tge mesiras pigliar er sche la chatscha speziala duai restar.

Mario Cavigelli vul discurs

Er il cusseglier guvernativ Mario Cavigelli è da l'avis ch'igl è uss da seser ensemen e sa discurrer co ins duai meglierar la chatscha speziala e tge mesiras ch'i fiss da realisar.

Passa 54% èn stads cunter iniziativa

Patria da l'iniziant Mathis ha sustegnì ferm el

La vischnanca da Rossa di cun 85% il pli cler NA a l'iniziativa per abolir la chatscha speziala. Il pli cler GEA ha ditg Conters cun 84%. Küblis, la patria da l'iniziant Christian Mathis è gist suenter Conters la vischnanca cun las segund bleras vuschs, 75% han ditg GEA. Da las regiuns han sulet quella da Partenz/Tavau e quella da Bernina vuschà per abolir la chatscha speziala.

Pat en il Surses

En bleras vischnancas hai dà ina decisiun stretga, cun mintgamai stgars sur u sut 50%. En Surses hai perfin dà ina situaziun da pat. Exact 444 persunas han mintgamai ditg GEA e NA.

RR votaziuns 12:00