La raschun per la critica: En il 24avel artitgel da la lescha da polizia da Panaduz stat scrit, che la suprastanza communala decida davart placats e reclama sin terren public.
Perquai che trais persunas da la suprastanza communala èn sin il placat, essan nus da l'avis che la decisiun na vala betg.
Lur critica han els publitgà sco emprim sin lur pagina da Facebook. Il di suenter han els er scrit in e-mail a la suprastanza per dumandar suenter.
Medem proceder sco adina
La presidenta communala Elita Florin-Caluori n'inclegia betg la critica da «Futuro Bonaduz». La dunna, ch’è er sin il placat sin la plazza dal vitg, manegia, che tar tals cas na decidia gnanc la suprastanza.
Mintga uniun ed organisaziun dastga dumandar per in permiss e tuts vegnan tractads tuttina.
Tenor Elita Florin-Caluori avess er «Futuro Bonaduz» survegnì la lubientscha da pender si lur placats sin terren public. Futuro Bonaduz n'ha dentant betg dumandà per lubientscha.
Betg cuntenta cun resposta
Quella decleraziun haja la chanzlia er declerà a la gruppa «Futuro Bonaduz». La gruppa na sa mussa dentant betg cuntenta cun quella decleraziun. Tenor ella na possia la PCD betg pender si ils placats. Els spetgan, che la partida prendia puspè giu sia reclama. Sezza n’ha la «Futuro Bonaduz» dal reminent betg dumandà per ina lubientscha per pudair pender si placats.
Ils 27 da settember elegia il suveran da Panaduz las autoritads communalas. Tranter auter datti in cumbat per il presidi:
