La Partida burgais-democratica dal Grischun PBD di Na a l'iniziativa cunter la chatscha speziala. Abolir la chatscha speziala saja in experiment betg necessari, hai gì num a la radunanza da delegads. Il sistem da chatscha actual cun chatscha auta e chatscha speziala saja sa cumprovà sur blers onns. Ina aboliziun da la chatscha speziala saja in experiment inutil che chaschunia be custs supplementars.
Duas giadas Gea ...
Plinavant han ils delegads da la PBD decis da dir Gea a la refurma fiscala e finanziaziun da l'AVS, quai cun 26 cunter 8 vuschs. Ils delegads èn da l'avis ch'ina refurma fiscala saja necessaria per mantegnair l'attractivitad e la cumpetitivitad da la Svizra. Era il provediment per la vegliadetgna dovria urgentamain ina refurma.
Detg Gea han els era al midament da la lescha d'armas, quai cun 35 cunter 1 vusch tar 1 abstenziun. Cun il gea vul ins impedir che Svizra perdia duas cunvegnas che hajan purtà bler a la Svizra. I saja impurtant che la Svizra restia commembra da l'allianza da Schengen/Dublin.
RR novitads 06:00