Ils 22 da settember 2013 han las votantas ed ils votants dal Grischun acceptà l’iniziativa chantunala dal pievel «Gea ad electricitad netta senza forza electrica da charvun». L’uschenumnada «iniziativa da charvun» pretenda cun ina proposta generala da fixar en la constituziun chantunala in cler confess cunter ovras electricas a charvun e ch'interpresas cun participaziun dal chantun n'investeschian nagut en talas ovras. Essend ina proposta generala ha la regenza gì da concretisar il text ed al sto suttametter anc ina giada a la votaziun dal pievel.
La nova disposiziun constituziunala garantescha
- ch’il chantun na cumpria naginas participaziuns da societads ch’èn participadas ad ovras a charvun.
- ch’il chantun procura – sco acziunari u participà – che las interpresas n'investeschian nagut en electricitad producida ord charvun insumma.
En la sessiun da favrer 2015 ha il cussegl grond approvà il project cun 93:0 vuschs tar 23 abstenziuns.
Resultat definitiv pir en il 2. chatsch
Tar la votaziun dals 22 da settember è la differenza da las vuschs pro e contra stada sut 0.3%, uschia che la chanzlia statala grischuna ha stuì dumbrar anc ina giada las vuschs sin la dumonda da tagl - numnadamain per l'iniziativa ubain la cuntraproposta.
Suenter la segunda dumbraziun è la differenza da vuschs creschida per 12 e munta a 137 vuschs.