Da 34 manaschis da victualias controllads en ils chantuns Grischun e Glaruna han ins constatà tar 13 mancanzas. Set manaschis han declerà la charn da l’exteriur sco indigena. Tschintg manaschis han inditgà be «UE» sco lieu d'origin, malgrà ch’il pajais exact stuess vegnir numnà.
Tranter ils 34 manaschis eran 32 restaurants, sco l'Uffizi per la segirezza da victualias e per la sanadad d’animals dal Grischun e da la Glaruna ha communitgà. L’examinaziun ha gì lieu il settember e l’october ed è sa concentrada sin restaurants ch'han durant la stagiun da chatscha fatg reclama cun plats cun charn da selvaschina.
L'Uffizi per la segirezza da victualias ha declerà, che la charn en l'exteriur saja pli bunmartgada. L'uffizi ha examinà etichettas e scrits da furniziun per chattar il pajais d'origin. Il resultat na saja betg cuntentaivel, perquai duai dar en il futur dapli controllas.