Per Armin Giossi che maina a Tschamutt in champ da vacanzas èsi in grond levgiament, che las mesiras strictas per champs scrodan. La decisiun saja vegnida tard avunda. Ma sche tut quels che hajan reservà vegnian lura era – pudess el mitschar cun in egl blau, uschia Giossi. Las sperditas per l’entira branscha sajan dentant grondas.
Var 250 annulaziuns
La fin d'avrigl ha il chantun mess en vigur l'ordinaziun pli stricta. Quella prevesan tranter auter ina limita dal dumber da participants sco er ch'i ston vegnir fatgs tests da corona regularmain. Sinaquai han pliras gruppas annullà lur reservaziuns ed èn ids en auters chantuns. 200 fin 250 gruppas sajan quai stadas. Quai ha ditg Christina Aenishäuslin envers RTR. Ella è manadra da groups.swiss, ina plattafurma ch'intermediescha chasas per champs en tut la Svizra. Er ch'ins annullescha uss las prescripziuns na gidia pli a salvar la stagiun da stad.
Forsa van anc gruppas pitschnas spontan en ina chasa da champs. [...] dentant la gronda part da las gruppas planisescha a lunga vista.
Ed ils champs da vacanzas sajan savens era in motor per il turissem, perquai ch'ils champs vegnian da tut aura e dovrian alura l’infrastructura, sco pendicularas u era purschidas da sport e cultura.
Prescripziuns da la Confederaziun valan vinavant
Perquai che la situaziun epidemiologica è sa meglierada, vegn la disposiziun dal chantun abolida. Uschia scrodan l'obligaziun d'annunzia sco er la cumprova da tests dal coronavirus negativs. Las prescripziuns da la Confederaziun restan però vinavant valaivlas.
Observar las regals
Sco champ vala mintga occurrenza organisada cun dapli che ina pernottaziun. Concepts da protecziun ston vinavant vegnir elavurads e realisads. L'Uffizi da sanadad appellescha da realisar quests concepts da protecziun e d'observar las reglas da distanza e d'igiena.
