Siglir tar il cuntegn

Header

video
Chastis digitals en il GR: Scannar il QR-code e pajar la multa online
Or da sil punct dals 09.08.2021.
laschar ir. Durada: 1 minuta 30 Secundas.
cuntegn

Chastis digitals en il GR Scannar il QR-code e pajar la multa online

La polizia chantunala e la polizia da Cuira dovran da nov ina app per reparter multas. Il policist u la policista che dat la multa, trametta las datas necessarias via app direct en la centrala. Era la persuna punida arriva, cun far in scan dal code QR ch'è sin il cedel, direct en il portal da multas da la polizia.

L’avantatg cun il code QR è che jau sai scannar quel cun mes telefonin e gist pajar la multa per exempel cun TWINT. Ina chaussa da tschintg secundas.
Autur: Andrea Deflorin manader da la partiziun da la polizia da la citad da Cuira

Pliras pussaivladads da pajar la multa

Dentant èsi vinavant pussaivel da pajar la multa cun in cedel da pajament, tranter auter cun empustar quel via la pagina che s'avra cun far il scan dal code QR u cun s'annunziar tar la polizia. Il numer da contact è sin il cedel da la multa. In'autra varianta è da pajar la multa sur la pagina en l'internet – lezza è era nudada sin il cedel. In'ulteriura varianta è da far nagut e spetgar 30 dis, enfin ch'il cedel da pajament vegn tramiss per posta a chasa.

audio
Chastis digitals: Polizia chantunala e polizia da la citad Cuira midan sin digital
ord Actualitad dals 09.08.2021.
laschar ir. Durada: 2 minutas 33 Secundas.

In mussavia per lantschar

L'entschatta datti tar mintga multa anc in flyer cun ina instrucziun co quel nov sistem funcziuna exact. Ma Andrea Deflorin è optimistic che las persunas chapeschan il nov sistem:

Dapli che la mesadad paja schon ils parcadis a Cuira digital, uschia che nus giain da quai anora ch’era dapli che la mesadad sa co in code QR funcziuna.
Autur: Andrea Deflorin manader da la partiziun da la polizia da la citad da Cuira

Introducziun successiva en l'entir chantun

La polizia chantunala introducescha l'app ed il cedel da la multa cun il code QR succesivamain fin mez settember en l'entir chantun. A Cuira vegn l'app duvrada davent dad immediat.

RTR sil punct 17:45

Artitgels legids il pli savens