La Regenza grischuna ha definì da nov ils asils da selvaschina en il chantun ed auza levamain il dumber sin il prim da settember. Sco quai ch'igl ha num en la communicaziun vegnan ils asils chantunals augmentads per 10 sin 451 asils, quai sin ina surfatscha da 746 kilometers quadrats. La finamira saja d'influenzar la repartiziun da la selvaschina uschia che la populaziun da tschiervs, chavriels e chamutschs po vinavant vegnir regulada principalmain durant la chatscha auta tradiziunala.
Dapi l'onn 1989 èn ils asils da selvaschina in element central da la planisaziun da la chatscha.
La rait d'asils da selvaschina saja vegnida surlavurada en stretga collavuraziun cun las chatschadras ed ils chatschaders, cun las represchentantas ed ils represchentants da l'agricultura e da l'economia forestala sco er cun las vischnancas. En cas da svilups disfavuraivels pon ils asils da selvaschina vegnir averts per part u dal tuttafatg.
En il rom da la nova regulaziun è il dumber
- d'asils da selvaschina generals (territoris cun scumond da chatscha total) sa reducì da 230 sin 229,
- d'asils da chatscha auta s'augmentà da 22 sin 30,
- d'asils da muntanellas sa reducì da 22 sin 20,
- d'asils da chatscha bassa vegnì auzà da 53 sin 59,
- d'asils da lieurs vegnì diminuì da 46 sin 45,
- d'asils d'utschels sa reducì da 21 sin 20,
- d'asils d'utschels da l'aua s'augmentà da 46 sin 47.
- Il sulet asil da chavriels en il chantun è vegnì mantegnì.
Tut en tut è il dumber d'asils da selvaschina chantunals s'augmentà dad actualmain 441 sin 451, quai tar ina surfatscha totala da 746 kilometers quadrats. Ensemen cun il Parc Naziunal Svizzer e cun ils sis asils da selvaschina federals resulta en il chantun ina surfatscha totala d'asils da selvaschina da 1'121 kilometers quadrats – pia in setavel da la surfatscha dal chantun.
Or da l'archiv:
