Siglir tar il cuntegn
Inhalt

Grischun Chatscha speziala sin tschiervs – dentant betg sin chavriels

Ina chatscha speziala sin tschiervs datti quasi mintg'onn en il Grischun. Er quest onn n'han chatschadras e chatschaders betg sajettà avunda tschiervs durant la chatsch'auta. Ch'i dat dentant nagina chatscha speziala sin chavriels è extraordinari.

Legende: Audio Bunura: Nagina chatscha speziala sin chavriels abspielen. Laufzeit 01:43 Minuten.
01:43 min, Actualitad dals 31.10.2018.

Curt e concis:

  • La chatscha auta 2018 è stada buna malgrà la bell'aura.
  • Pervia da la chatscha mediocra sin tschiervs datti ina chatscha speziala.
  • Sin chavriels datti nagina chatscha speziala.
  • La chatscha sin chamutschs è stada buna fin fitg buna.

L'emprima giada nagina chatscha speziala sin chavriels

L'uffizi da chatscha ha decis ch'i na dovria nagina chatscha speziala sin chavriels. Quai saja extraordinari, ha declerà il schef da l'uffizi da chatscha e pestga Adrian Arquint sin dumonda da RTR. Tant sco el possia dir, saja quai l'emprima giada dapi l'onn 1997 - dapi che quella chatscha speziala è vegnida introducida - ch'i na dettia nagina chatscha speziala sin chavriels.

Chatschadras e chatschaders han sajettà quest onn 1'924 chavriels. Quai è be circa la mesadad dal dumber da la chatsch'auta 2017 e circa in terz cumpareglià cun la media dals ultims 10 onns. Sper il dumber sajettà saja era da resguardar che l'effectiv da chavriels saja bass en il Grischun. Ils animals hajan numnadamain patì l'enviern passà cun blera naiv, uschia Arquint.

Chatscha speziala sin tschiervs

La chatsch'auta sin tschiervs è stada mediocra cun 3'403 animals sajettads. Quai èn bain 1'445 pli pauc che l'onn passà - dentant è quella cifra en la media dals ultims 10 onns.

Ina chatscha speziala è perquai necessaria en 19 da 21 regiuns. Be en la Bregaglia ed il Puschlav han chatschadras e chatschaders sajettà avunda tschiervs - là na datti nagina chatscha speziala.

Buna chatscha malgrà la bell'aura

Tut en tut è l'uffizi da chatscha dal Grischun cuntent cun la chatscha - malgrà che l'aura saja bunamain stada memia bella per far preda. 219 chatschadras e 5224 chatschaders han prendì part a la chatsch'auta 2018.

Insumma saja la chatscha perfin stada meglra che quai che blers hajan gì l'impressiun gist a la fin dal temp da chatscha auta. Ina survista:

Preda chatscha auta 2018 (2017):

Preda chatscha auta 2018 (2017):

total 2018 (2017)
masculinsfemininsrelaziun tranter
las schlattainas
tschiervs3403 (4848)1939 (2878)1464 (1970)1 : 0.76
chavriels1924 (3708)1127 (2216)797 (1492)1 : 0.71
chamutschs3362 (2989)1706 (1488)1656 (1501)1 : 0.97
portgs selvadis
11 (15) 6 (6)5 (9)
selvaschina d'ungla
8700 (11548)

RR novitads 08:00+