Gia da pitschen ensi è Niculin Parli fascinà da la chatscha. Cun tschintg onns ha el pudì accumpagna l’emprima giada ses bab Linard. Dapi lura èn bab e figl da viadi ensemen durant las fin d’emnas e mesemna suenter mezdi, cura che Niculin na sto betg esser en scola.
Durant la filmada cun noss moderatur Livio Chistell ha el mussà, quant gronda che sia savida da la chatscha è. El ha tranter auter mussà co s’avischinar a la bestga ubain declarà pertge ch'i na renda betg da sajettar muntanellas pitschnas.
Uffants a chatscha – in tema dispitaivel
Figl Niculin e bab Linard Parli han ensemen gia pudì sajettar in chavriel e diversas muntanellas. Sco Linard Parli raquinta, haja el discurrì surda quai cun ses figl e declarà tge che quai munta. «Sco bab hai jau la responsabladad da guardar sin sia segirtad e sin ses bainstar». El na lessia betg scumandar a ses figl da vegnir cun el a chatscha.
Tar la mondura da chatscha tutga per Niculin er in pitschen schluppet da lain. Cun quel gioga el da chatschadur.
El emprenda da pitschen ensi d'ir enturn cun armas correctamain.
Livio entaupa in «Giovanni per Tutti»
Durant la chatscha n’èn betg be chatschaduras e chatschadurs en acziun. Sin bleras chamonas sustegn ensatgi d’organisar, cuschinar e transportar. In da quels gidanters ha Livio Chistell inscuntrà a Brail en l’Engiadina. Linard Godly è gia dapi prest 20 onns in gidanter sin chamona, u sco el numna sasez «Giovanni per tutti». In che gida nua ch'i dovra gist.
Cunquai ch'i gira bler en mes manaschi l’atun, na poss jau betg ir sez a chatscha.
Uschia possia el viver sia passiun per la chatscha e tuttina esser qua per ses animals sin il bain puril.
RTR ha accumpagnà el il di avant che la chatscha ha puspè cumenzà. E sco empermess, ha Livio schizunt gidà a far ora lenna per lura cuschinar ils spaghettis la saira.
Sin visita tar ils Orliks – e Livio sto suar
La gronda part da la famiglia Orlik ha festivà lur retg da lutga la mesemna saira a Maiavilla. Per ils chatschadurs Orlik che van a chatscha en Val Russein fissi stà in zic in lung viadi. Perquai ha Livio Chistell visità els sin chamona. El è arrivà en il dretg mument. Sandro Orlik aveva gist sajettà ina sterla, gia la segunda quest'emna.
La dumengia è mes cusrin daventà retg. Mia finamira era da sajettar in di pli tard in taur. Ina bellezza sterla è dentant era ina bella preda.
Bler pli strentg che pensà
Noss moderatur Livio ha gidà da manar la sterla a val. El è stà surprais quant grev che uschè in animal è. La fin ha el dentant pudì far in viva cun ils chatschadurs en lur chamona. «La festa cun Armon na scappa betg. El è retg per adina – quai è bellezza», di Sandro Orlik.
Vuls ti era che Livio vegn sin visita? T'annunzia. Ils detagls chattas en l'artitgel qua sut:
Livio sin visita a Cungieri
Prender il temp per ir a chatscha n'è betg adina simpel, en spezial sco mamma e cun avair ina fatschenta. Quai raquinta Andrea Cavegn-Beer durant cuschinar il «fratem parler».
Cun ses um maina ella ina ustaria a Sedrun. Actualmain cumbattan els cun mancanza da persunal. Per ella haja quai in grond effect sin la chatscha, cunquai ch'ella na po atgnamain betg esser davent da la fatschenta uschè savens sco giavischà.
Igl è forsa in zic egoistic, ma quels 21 dis less jau schon esser davent.
Per ella munta quai pia blera lavur organisatorica en connex cun la lavur e la famiglia. Ma quella lavur valia la paina. «En mes cor era quai adina cler che jau vom a chatscha. La dumonda era simplamain co». Ella giauda il temp da chatscha en cuminanza sin chamona e turna adina cun nova energia en la val.