Dapi 21 onns va Giusep Arpagaus a chatscha. Durant quel temp vesan ins blers bels animals en il guaud. Savens saja dentant uschia: ils trais dis ch'ins pudess sajettar taurs da curuna, na vesian ins nagins, manegia el. Quest onn hajan el e ses collegas savì ch'i haja en lur territori en la regiun da Breil in taur.
Nus avain savì ch'insatge è denturn, dentant nus n'avain betg savì che quai saja uschia in fegher.
Il plan è stà il suandant: in da la gruppa, Martin Caduff, va a chatschar. Giusep Arpagaus ed il terz da la gruppa, Ivan Muoth, stattan sin il post. Tuttenina haja el vesì l'animal – in taffer taur-tschierv . «Lura n'han ins betg bler temp. Ins sto decider aifer secundas – quai va uschè svelt», di il chatschadur da 41 onns.
Il mument che Giusep Arpagaus ha realisà ch'el ha tutgà e fatg preda, saja ì uschè bler atras il chau. Suenter sajan els ids ensemen al lieu. Ils collegas s'hajan embratschads ed hajan prendì temp da giudair il mument, contemplar l'animal e mussar ad el respect.
Quai è in mument ch'ins na vegn forsa mai pli ad avair en la vita.
Suenter avair organisà il transport, sajan els lura rivads giu. Perfin la mamma da Giusep – uschiglio mai da la partida cura ch'el arriva cun preda – saja stada là.
Cura che la novitad dal taur da siemi è sa derasada, han er cumenzà las dumondas. Bleras e blers collegas vulevan savair dapli dal taur, dal lieu e co ch'igl è stà. «L'interess è fitg fitg grond, uschè insatge fa spert la runda», di Giusep Arpagaus. Ins haja lura visità las famiglias e mussà il taur-tschierv per exempel er ad uffants da scola ch'eran gist da return cun il bus da scola. «Blers han fatg gronds egls», di el. I saja propi bel, er che la glieud prendia part da quest eveniment.
La gruppa haja giaudì quels inscunters e da pudair mussar la preda. Per el haja quai er da far cun respect envers l'animal. Da subit purtar il tschierv tar il mazler na saja betg quai che la gruppa veglia, quai giaja ozendi or da lur vista savens memia svelt. Plinavant saja natiralmain bel dad avair sajettà uschè in taur. Perquai n'haja el dentant betg ina pli gronda muntada. «Animal è animal – e mintg'in ha merità respect».
La charn dal taur vegnia dal rest partida sin els trais. I dettia magari che tals taurs cumenzian a savurar. Quel qua però na savuria betg ferm. El sajan cun otg fin 10 onns en ils megliers onns.