Siglir tar il cuntegn

Header

audio
Chauras-capricorn ston vegnir reguladas
Or da Actualitad dals 06.03.2023. Maletg: Keystone
laschar ir. Durada: 2 minutas 56 Secundas.
cuntegn

Chatscha extraordinaria Sajettar dapli chauras-capricorn

La primavaira passada ha il chantun dumbrà uschè blers capricorns sco anc mai. Memia blers animals avessan dentant consequenzas negativas. Per evitar che las populaziuns creschan vinavant vul il chantun far ina chatscha extraordinaria sin chauras-capricorn.

Concret vul il chantun laschar sajettar 54 chauras-capricorn dapli, quai dasper la chatscha da capricorns regulara. Quai sajan 22% dapli chauras che l'onn avant. Il motiv è il suandant: Populaziuns memia grondas pudessan avair consequenzas negativas entaifer la spezia, sin il spazi da viver u sin autras spezias.

Anc mai dumbrà uschè blers capricorns

Ils capricorns sa sentan para bain en Grischun. Tar la davosa dumbraziun ha l'Uffizi chantunal da chatscha registrà var 6'920 capricorns – uschè bler sco anc mai. Quai di il biolog da selvaschina da l'uffizi, Lukas Walser, envers RTR.

Quai ha plirs motivs. In motiv impurtant è segir ils envierns miaivels.
Autur: Lukas Walser biolog da selvaschina da l'Uffizi da chatscha e pestga

Durant envierns miaivels survivan dapli animals, uschè che la populaziun crescha. Plinavant n'hajan ins betg accumplì las finamiras da sajettar dals davos pèr onns.

Effects negativs per animals e spazi da viver

Memia blers animals possian dentant avair plirs effects negativs. Sche la populaziun crescha, sa derasan malsognas – sco per exempel la tschorvadad da chamutschs – pli spert. Plinavant crescha la concurrenza tranter ils capricorns, dentant er la concurrenza cun auters animals, sco ils chamutschs. Dapli animals duvrassan er dapli plazza. Ins veglia dentant evitar ch'ils capricorns arrivan en regiuns pli bassas e fan per exempel donns tar guauds da protecziun.

27 chatschadras e chatschaders supplementars

Per regular ils capricorns vegnan 27 chatschadras e chatschaders admess a la chatscha extraordinaria. Mintgina e mintgin duai sajettar duas chauras-capricorn senza ansiel. Pli paucas chauras munta pli paucs ansiels, ed a lunga vista pli paucs animals. Questa chatscha duai avair lieu parallel cun la «normala» chatscha da capricorns.

Regiuns per la chatscha extraordinaria

Avrir la box Serrar la box

La chatscha extraordinaria sin chauras-capricorn è mo pussibla en questas colonias da capricorns.

  • Güglia nord (Avras)
  • Macun
  • Umbrail
  • Hochwang
  • Caschleglia/Vial
  • Calanda
  • Parts dal Flüela

S'annunziar per la chatscha supplementara pon tut ils chatschaders e las chatschadras che han gia fatg ina giada chatscha sin capricorns. Sch'il chantun survegn lura dapli annunzias che necessari, vegn tratg la sort. Il temp da spetga per ina futura chatscha da capricorns na vegn betg influenzada.

RTR novitads 09:00

Artitgels legids il pli savens