Siglir tar il cuntegn

Header

video
La pli bella fotografia da chatscha
Or da Telesguard dals 04.10.2021.
laschar ir. Durada: 28 Secundas.
cuntegn

Votaziun La foto da Corsin Simeon è la pli bella

Bunamain 250 fotografias ha RTR survegnì durant la chatsch'auta da quest onn. Dentant: Tgenina è la pli bella foto da chatscha 2021? Vus avais decis.

Igl è decidì: La pli bella fotografia è quella da Corsin Simeon. El gudogna cun quai in bon da 500 francs tar ina fatschenta da sport e vestgadira da chatscha. Plazza dus va a la foto da Walter Monn, cun la metoda da transport speziala. El survegn in bon da 300 francs. Plazza 3 va ad Adriano Dosch cun sia bella atmosfera. Per el datti in bon da 200 francs.

audio
Corsin Simeon ha fatg la pli bella fotografia da chatscha
ord RTR Audio dals 04.10.2021. Maletg: RTR
laschar ir. Durada: 3 minutas 47 Secundas.

Las fotos originalas e l'argumentaziun da la giuria

Immens gronda schelta – immens greva lavur

La giuria da chatscha n'ha betg gì ina simpla lavur: Ord bunamain 250 fotografias ha ella dastgà tscherner be tschintg. Cler che quai ha duvrà bleras discussiuns, argumentaziuns e forsa era in u l'auter cumpromiss aifer la gruppa.

Nus avain vulì resguardar tut las regiuns, il respect envers l'animal e mussar la variaziun da la chatscha grischuna.
Autur: Walter Candreia Redactur dal «Chatschadur Grischun»

L'um dal fatg en la giuria fa er in cumpliment a chatschaduras e chatschadurs: Adina dapli fotografias vegnan fatgas senza buis, ubain enten tegnair correct l'arma ed i vegn era fotografà cun respect ils animals. Plinavant èsi da dir: Quest atun è l'aura natiralmain era stada ideala per fotografar.

L'atun porscha in'atmosfera speziala, cunzunt la bun'ura e la saira cun las colurs ubain la tschajera mistica.
Autur: Cundrau Spescha Fotograf d'animals e da natira

I na fa pia betg surstar che RTR ha survegnì bleras fotografias cun impressiuns da culms e valladas, da levadas e rendidas dal sulegl – sper las fotografias da las predas. La giuria è pia stada fitg cuntenta ed impressiunada da las fotografias ch'il public dad RTR ha mess a disposiziun.

Las fotografias da chatscha vegnan mintg'onn pli bellas e mintg'onn vegn nossa lavur pli greva.
Autur: Corina Luck Redactura online RTR
Foto da la giuria da chatscha RTR
Legenda: La giuria a la lavur: Cundrau Spescha, Corina Luck e Walter Candreia vid discutar, selectar, reponderar, persvader... RTR
audio
Las fotografias da chatscha – Vus decidais la pli bella
ord Actualitad dals 02.10.2021. Maletg: RTR
laschar ir. Durada: 2 minutas 55 Secundas.

Giuria da chatscha RTR

Avrir la box Serrar la box
Legenda: Cundrau Spescha, Walter Candreia e Corina Luck RTR

Sco gia l'onn passà han trais persunas fatg part a la giuria:

  • Cundrau Spescha, fotograf d'animals e da natira
  • Walter Candreia, redactur «Chatschadur Grischun» e sez chatschadur
  • Corina Luck, redactura online tar RTR e betg chatschadura

Tgi che vul sfegliar anc ina giada en omaduas galarias, po gugent far quai:

RTR chatscha 17:00

Artitgels legids il pli savens