Ils plazs cun la meglra survista restan vinavant serrads en ils bus da Cuira, da l’Engiadina ed en ils autos da posta. Quai per che la distanza tar il chauffeur possia vinavant vegnir tegnida e lez na stoppia betg avair si ina mascra l’entir di. Ils chauffeurs hajan a disposiziun mascras, meds da dischinfectar e guants, ma plexiglas na vegnia betg montà.
Blers chauffeurs speran ch’ils blers clients cumprian lur bigliet vinavant online e che mo paucs cumprian direct en il bus.
Schegea ch’ins possia puspè cumprar ils bigliets direct en il bus u l'auto da posta, appelleschan las interpresas da traffic public a lur clients da tuttina cumprar vinavant lur bigliets online u tar in automat. La raschun daco che l’AutoDaPosta ed ils bus hajan schluccà quella mesira, saja la gronda dumonda suenter la vendita directa.
Nov sistem en l’Engiadina
En l’Engiadina possian ils giasts, cura ch’els cudescheschan in hotel u ina abitaziun da vacanzas, gist er cumprar ils bigliets per il bus. Uschia vegnia evità ch’els cumprian direct tar il chauffeur, di il pledader da medias, Ralf Kollegger.
Sentiments maschadads tar ils chauffeurs
Ils sentiments sajan maschadads, di il pledader da medias d l’AutoDaPosta, Urs Bloch. In qual sa legrian da puspè dastgar vender bigliets ed uschia avair contact cun ils clients. Ma auters hajan era respect da quella nova situaziun.