En Svizra èn oz, ils 14 da zercladur, las dunnas danovamain idas sin via per pretender lur dretgs cun numerusas acziuns en l'entir pajais. En il center da la «chauma da dunnas» stat quest onn la pretensiun suenter meglieras pajas e rentas da vegliadetgna sco er avunda plazzas per la tgira d'uffants e dapli protecziun da violenza sexuala.
A las 15:19 han bleras dunnas chalà da lavurar. La discriminaziun da paja è dapi il 2019 numnadamain anc s'augmentada. Quintà enturn sin in di, lavuran las dunnas uss gia davent da las 15:19 gratuit enstagl da davent da las 15:24.
A Turitg ed a Cuira hai perquai il suentermezdi a las 15:19 dà in'acziun da canera, a Berna in flashmob en direcziun enavos per far attent sin il retard da la Svizra puncto egualitad. En auters lieus hai dà picnics feministics e workshops.
Il chantun duai dar in bun exempel
Il chantun Grischun duai publitgar en l'internet sia tabella da paja sco er agiuntar a inserats per plazzas la paja d'entrada. Quai pretenda la deputada da la PS Silvia Hofmann en ina moziun ch'ella ha inoltrà oz en il Cussegl grond. «Be sche las dunnas san quant che ils collegas masculins fadigian, pon ellas er reagir», di la deputada. Perquai duai il chantun vegnir pli transparent e dar uschia in bun exempel per cumbatter l'inegualitad da paja tranter umens e dunnas.