Empustar in chaun online
Dapli che la mesadad dals chauns che vegnan registrads en Svizra vegnan importads da l'exteriur. In grond problem è tenor il BLV, l'Uffizi federal per fatgs veterinars, che adina dapli chauns vegnan era empustads sur l'internet. Uschia pon ins cumprar in animal be cun in pèr clics. Ils chauns vegnian lura transportads cun l'auto en Svizra e surdads avant l'isch-chasa. Tenor il BLV datti tras questa metoda da cumprar animals da chasa gronds privels. Er il veterinari chantunal Giochen Bearth avertescha dals privels. Quels e quellas che cumpran na considereschian betg ils privels.
Ina cumpra online è in no-go. Ins dastga tschertgar inserats, ma ins duai laschar la detta da paginas nua ch'ins po cumprar in chaun senza emprender d'enconuscher el.
Il risico d'importar malsognas sco per exempel la ravgia da chauns è gronda perquai ch'ils chauns empustads vegnan allevads en pajais sco en l'Europa dal Vest, nua ch'i dat anc questa malsogna. Betg be per la societad saja quai in risico, mabain era per ils possessurs che vegnan confruntads cun auts custs u perfin la mort dad in chagniel. Er en il Grischun è quest privel grond – radund 750 chauns vegnan mintg'onn importads en il chantun.
L'import da chauns è en moda perquai ch'ins chatta razzas nunusitadas ed il pretsch è pli bass cumpareglià cun quels en Svizra.
Betg be las malsognas sajan in privel. In auter è tenor Giochen Bearth la sozialisaziun dals chauns da l'exteriur. Blers derivian da tratgas che funcziunan sco fabricas da chauns e blers chauns sviluppan temas u aggressiuns cunter umans ed auters chauns. Uschia saja ina sfida da tegnair in chaun e blers patruns e patrunas na sajan betg capabels da far quai ed uschia sa tschentan blers en ina pensiun d'animals.
Campagna da l'Uffizi per fatgs veterinars
Il problem è dapi in temp enconuschent a l'Uffizi federal da segirezza alimentara e fatgs veterinars. Pervia da quai han els inizià ina campagna per sensibilar la populaziun per questa tematica. Era las leschas per l'import da chauns èn sa midadas. Per exempel èsi scumandà d'importar chaniegls per la vendita ch'èn pli giuvens che 15 emnas. En l'UE datti questa vegliadetgna minimala gia dapi l'onn 2013. La finamira da questa midada è ch'ils chauns da l'exteriur ston uschia star pli ditg tar la mamma e custan lura era dapli a l'allevatura u a l'allevatur.
Dapli infurmaziuns da l'uffizi federal per fatgs veterinars
Or da l'archiv
