Chonv sin mintga plat svizzer chonv. Quai è stà avant in pèr onns la visiun da AlpenPionier. Carlo Weber, in dals fundaturs, ha cun ses studi d'inschigner da victualias scuvert il chonv da nutriment sco funtauna da proteins predestinada per la cultivaziun en regiuns muntagnardas.
Uschia vegn ussa elavurà mintg'onn da quai da 20 tonnas producidas per gronda part da purs en il Grischun. Lur chonv na cuntegna naginas substanzas narcoticas u stimulantas sco THC u CBD.
Roman Eggenberger, l'anteriur um da bancas dal Principadi dal Liechtenstein è sper las finanzas er responsabel per il martgà, ils basegns, il marketing. Per il 2022 ed ils proxim onns è el fitg optimistic. Lur products vegnan en ils regals dals detaglists gronds e quai munta dapli visibilitad ed uschia er dapli acceptanza d'in product sco chonv.
Castrisch: Racoltà tut a dubel
A Castrisch è quest onn vegnì racoltà per la terza giada il chonv CBD. I ha dà ina detga surpraisa per Gian Garofalo da la stizun Bougis. Cun l’experientscha da trais onns ha el vulì optimar la racolta sin quella hectara a Castrisch. Fin ussa deva quai ora var 20 grams chonv setg sin mintga plantina.
La finamira è stada da vegnir sin 100 grams per plantina. La gronda surpraisa: La racolta ha mussà ch'i dat ora bunamain 500 grams per plantina. Il chonv CBD n'è betg psicoactiv, ma quietescha. Perquai è quel era lubì da cultivar.
Chonv era al Plantahof: Attractiv er per l'agricultura
Er al Plantahof vegn semnà suenter quatter onns chonv. Tenor Batist Spinatsch saja il chonv ina plantina predestinada per regiuns sco il Grischun. Il Grischun haja da l'entschatta ennà sustegnì er finanzialmain ils purs cun pajaments directs. A partir dal 2022 vegnan ils pajaments directamain da Berna.
En regiuns pli autas, nua che granezza ha forsa difficultads da crescher bain, saja il chonv ina fitg buna alternativa ed er lucrativa, uschia il manader cussegliaziun e furmaziun al Plantahof Batist Spinatsch. La fin finala decidia dentant il martgà.
