L’idea dal festival «Chur Offa» era naschì il 2020 perquai ch'occurrenzas grondas n'eran betg lubidas. Perquai ch’ins haja sentì che la glieud haja anc adina gust dad art pitschen en il spazi public da la citad da Cuira, va il festival quest onn en la quarta runda.
Dal center en ils quartiers
Uschia datti quest onn preschentaziuns en differents quartiers en la periferia da Cuira: en il parc da sculpturas Würth, sin il prà en il Lacuna, sin la plazza avant il Ap'n'Daun ed en il Bienengarten. Per il cas che l'aura na fetschia betg gust sin musica sin via, dettia mintga di – auter che la gievgia – in'alternativa sut tetg. I saja bain pussaivel ch'i dettia quest onn pli pauca clientella occasiunala, di Andi Schnoz dal comité d'organisaziun. Perquai hajan ins gia oravant prendì mesiras per dar cunterpais: quest onn hajan ins fatg pli blera reclama per il festival ch'ils ultims trais onns.
Potpurri da surpraisas
Il pli spezial dal «Chur Offa» saja ch'ils artists e las artistas fetschian sezs il program: els s'annunzian per il festival e decidan lura sezs tge ch'els ed ellas preschentan. Las preschentaziuns giajan plitost en la direcziun da stil da chantautur, dentant na sappia il comité d'organisaziun betg tge che mintgin e mintgina fetschia exact. Els sajan er fitg mirveglius. La gronda part dad els ed ellas hajan in connex cun il Grischun.
Sch'i dettia proxim onn in ulteriur «Chur Offa» stettia anc en las stailas. Quai vegnia adina decidì dad onn tar onn – e dependia er sch'ins chattia avunda glieud che gida. L'entira organisaziun e lavur è numnadamain voluntaria. Tut ils concerts èn gratuits, in dat ina collecta en favur dals artists e las artistas.