Siglir tar il cuntegn

Header

cuntegn

Grischun Cifras negativas 1: -16,3% tar las pernottaziuns grischunas

Il trend vers aval cuntinuescha. Da 18 destinaziuns grischunas èn mo las cifras da Bregaglia (162 pernottaziuns/ +18,2%) e San Bernardino, Mesolcina/Val Calanca (1’304 pernottaziuns / +10,2%) positivas. Quai communitgescha l’Uffizi per economia e turissem dal Grischun.

Congualà cun il schaner 2015 ha il Grischun pers il schaner 2016 106’216 pernottaziuns. Mess en relaziun cun la media dals ultims 5 onns èn las cifras anc pli nauschas: cun -19,1% ha il Grischun pers mintga 5avel giast.

Val Puschlav e Savognin sperdiders pli gronds en Grischun

Da las 16 destinaziuns che perdan nodan la Val Puschlav ( - 36,8% / 785 pernottaziuns) e Savognin (- 31,9% / 9'053) ils pli gronds minus en cumparegliaziun cun l’onn passà.

Grischun sperdider pli grond en Svizra

En la statistica svizra è il Grischun danovamain la regiun turistica cun il regress pli marcant da tut las regiuns en Svizra. Quai mussan las cifras publitgadas da l'Uffizi da statistica federal. Il chantun Valais ha - 9% pernottaziuns, l'Oberland Bernais -7% pernottaziuns.

L’hotellaria svizra ha pers in schaner 2016 6,8% da las pernottaziuns. En cifras absolutas èn quai 189’000 pernottaziuns pli pauc.

  • En emprima lingia han mancà giasts da l’exteriur: - 8,4% u - 120’000 pernottaziuns.
  • Ma era las Svizras ed ils svizzers mancan: - 5,2% u - 69’000 pernottaziuns.

L’uffizi da statistica federal numna las relaziuns da naiv pac favuraivlas sco raschun principala per il minus.

RTR novitads 10:00

Artitgels legids il pli savens