Entant che l’hotellaria ha pir publitgà las cifras dal schaner, na laschan supponer las cifras da las pendicularas grischunas nagut da bun: las pendicularas han communitgà en lur monitoring dad avair transportà en favrer 2016 8,4% pli paucs giasts ch’anc en favrer 2015.
Aura ed euro èn responsabels
Era tar las pendicularas è il regress marcant. Las raschuns sajan evidentas, scrivan las pendicularas.
Il svilup da las cifras en favrer mussia cleramain, ch’ils giasts da la zona da l’euro manchian, scrivan las pendicularas: «Per fortuna èn ils giasts svizzers fidaivels al Grischun.»
L’aura saja stada enfin la fin da december massa setga e chauda, suenter massa variada e chauda. La stagiun d’enviern actuala è per 2,6 grads pli chauda ch’in media ed uschia la stagiun la segund-chauda dapi che las temperaturas vegnian mesiradas.
Il trend negativ na sa laschia betg pli fermar
L'aura dal schaner e favrer ha fatg in stritg tras il quint da las pendicularas grischunas per pudair prender suenter in zic las perditas sur Nadal e Bumaun. Dapi l'entschatta da la stagiun fin la fin da favrer è quai ina reducziun da passa 13%. Tenor il monitoring quintan las pendicularas per la fin da quest enviern cun perditas da 10 fin 15 %, en cas singuls era cun anc dapli.
Cundiziuns da rom, che sajan dad acceptar uschia, concluda il monitor.
Il monitor da las pendicularas Grischunas cumpiglia cun 22 pendicularas radund 90% da la svieuta da transport grischuna.
RR novitads 11:00