«Jau avess gugent ina guafla cun ina rucla da pistazia!» – uschia tuni il suentermezdi en la glatscharia ed ustaria. En la a vitrina sa chattan glatschs da tuttas colurs: alvs, mellens e schizunt in blau. Sper sorts classicas sco stracciatella e vaniglia porscha la glatscharia era creaziuns pli extraordinarias sco il glatsch d'ananas. Las 18 sorts en la vitrina vegnan adina puspè cumbinadas da nov.
Vera Rupf ed Esther Bosshart tutgan tar il team da la glatscharia. Las duas dunnas che portan omaduas il medem tenu brin raquintan dals glatschs preferids da la clientella. Tenor Esther Bosshart è il «Whisky crema» dumandà tar glieud creschida entant ch'uffants prefereschan il glatsch blau pervia da sia colur.
Il glatsch da «cookies» è fitg popular. La clientella dumonda schizunt suenter sche quel manca.
-
Bild 1 von 2. Giuadora sin terrassa giauda la clientella lur glatschs. Bildquelle: RTR, Laura Schütz.
-
Bild 2 von 2. In egliada sin ils cups vids tradescha ch'ils glatschs han gustà. Bildquelle: RTR, Laura Schütz.
In um che sesa giuadora sin terrassa manegia ch'el restia pli gugent tar las sorts classicas. Ses glatsch preferì saja vaniglia, il glatsch «da basa» per dir uschia.
Betg ina glatscharia ordinaria
Famiglias cun uffants, glieud pensiunada u persunas che lavuran en la vischinanza – la clientella ch'entra en il «Circolo» è fitg vasta. Mintga di saja ina surpraisa, di la mainagruppa Esther Bosshart che stat davos la vitrina. Sch'i saja uschè chaud sco uss, vegnia la glieud per part plitost encunter saira cura ch'igl è in zic pli frestg giuadora. Ils glatschs paran en mintga cas da gustar – sco in'egliada sin ils cups vids giuadora sin la terrassa tradescha. Circa 20 fin 30 da quels cups per mangiar en glatscharia vegnan empustads per di, raquinta Vera Rupf. Glatschs per prender cun vegnan per gronda part cumprads en in cup, betg en ina guafla.
Tar la glatscharia tutga era anc in'ustaria. I n'è dentant betg ina fatschenta ordinaria.
Nus essan in team da 18 persunas. Da quellas èn 12 «clients» e «clientas» cun impediments che vegnan accumpagnadas en il mintgadi da lavur.»
-
Bild 1 von 2. La mainagruppa Esther Bosshart e la cuschiniera Carin Meier. Bildquelle: RTR, Laura Schütz.
-
Bild 2 von 2. Il «client» Ivan Leemann e l'accumpagnadra e camariera Vera Rupf. Bildquelle: RTR, Laura Schütz.
Clients e clientas – uschia vegnan las persunas cun impediments numnadas che lavuran en la glatscharia. Il «Circolo» tutga sco la glatscharia «Evviva» era tar «Plankis». «Plankis» è ina fundaziun grischuna ch'emploiescha pli che 120 persunas cun impediments en differentas spartas economicas. A la clientella che lascha gustar ils glatschs en ustaria plascha il concept. Reto Michel per exempel raquinta ch'ils «clients» e las «clientas» hajan plaschair da discutar.
Lur concept è in dals motivs principals pertge che jau sun uschè savens en il «Circolo».
II giuven camarier Ivan Leeman è in dals uschenumnads clients da la glatscharia ch'ha festivà ses giubileum d'in onn avant in mais. Ivan Leeman raquinta che la purschida attiria adina dapli clientella. Quai legra era la mainagruppa Esther Bosshart. Adina puspè arriva insatgi per empustar in glatsch. Cun bucca rienta serva ella la clientella.