La scena da drogas a Cuira dat adina puspè da discutar e tras il nov local da consum duai la situaziun vegnir calmada in pau. La citad ha dentant er en egl las circumstanzas d'abitar da quests carstgauns, pertge blers vivan sut cundiziuns d'abitar irregularas. La citad vul ussa dentant che las persunas dependentas da drogas possian salvar lur abitaziun sche pussaivel per ch'els na stoppian betg viver sin via. Quai è ina da pliras finamiras dal nov rapport «abitar en situaziuns d’urgenza» che la citad vul realisar. Las mesiras proponidas en il rapport duain ussa procurar per meglieraziun.
Igl è temp d'agir
Radund 40 persunas che vivan a Cuira n'han nagina abitaziun ed ina part viva schizunt sin via. Pertutgadas èn cunzunt persunas dependentas da drogas. Dapi l'onn passà è il dumber da las persunas senza tetg sa dublegià en la chapitala grischuna. Quest svilup fa uss era quitads a la regenza, sco Patrik Degiacomi, il cusseglier responsabel di.
Ils davos onns han bleras persunas pers lur abitaziun. Nus vulain ussa dar cuntrapais a quest svilup.
La citad duai ussa sviluppar in concept cun tut ils detagls per la planisaziun. Avair in tetg sur il chau, quai duai er esser pussaivel per quels e quellas che n'han betg ina schanza realistica sin in'abitaziun. Sco quai che la regenza communitgescha, vegni l'entschatta dal 2024 tranter auter a dar in project da pilot, in uschenumnà «Housing First». Concretamain vai persuenter, da metter a disposiziun als pertutgads ed a las pertutgadas localitads u chombras per che quels possian abitar en quellas.
La regenza metta uss sin via l'incumbensa per il project. Quel duai meglierar la situaziun d'abitar da persunas en miseria. Sche la regenza accepta la proposta, duain ils emprims effects sa mussar gia en il decurs da l'onn proxim.
