La primavaira 2024 ha Cuira cumenzà cun ina da sias pli grondas reorganisaziuns en l'administraziun. Ils secturs servetschs da chasa, nettegiament e mantegniment dal manaschi vegnan mess ensemen en in sectur. Sur tschient persunas èn pertutgadas. La finamira da quella reorganisaziun è da crear sinergias, simplifitgar andaments e spargnar daners.
Jau pens ch'i ha duvrà questa reorganisaziun, perquai che l'ambient sa mida ed uschia era las incumbensas. Ultra da quai lessan nus guardar en il futur e crear plazzas da lavur attractivas.
Persunas pertutgadas n'èn betg d’accord
Betg tut las persunas èn d'accord cun quella reorganisaziun, quai mussan retschertgas dal schurnal regiunal da SRF. L'ultim onn e mez han 26 persunas disditg lur plazza, sis da quellas eran persunas da cader. Era sche quai saja en media pli paucas persunas che tar auters departaments, è l'agitaziun uschè gronda, che la cumissiun da gestiun ha reagì.
Ina gruppa da collavuraturs ha ramassà suttascripziuns cunter la reorganisaziun. Sin quai han reagì persunas ch'eran per la reorganisaziun ed han era ramassà suttascripziuns. La cumissiun da gestiun ha examinà la critica e s’ha lura inscuntrà cun la suprastanza.
Il president da la citad, Hans Martin Meuli è perencletg cun la critica. Ma el resta tar sia decisiun.
La critica principala è stada d'ina vart la communicaziun e da l'autra vart il reglament. Durant questa reorganisaziun è bler nov, ed ins n'è betg disà da quai. E lura datti er in u l'auter lieu, nua ch'ins sto improvisar.
Tge sto la suprastanza midar en l'avegnir?
Il settember ha la suprastanza discurrì cun las persunas pertutgadas. Il december duai quai puspè dar discurs. La citad haja cun quest’entira situaziun badà ch’els ston en l’avegnir communitgar meglier. Vinavant ston els ralentar il tempo, uschia che tuttas e tuts pon proseguir.
Entant cuntinuescha la cumissiun da gestiun la lavur e sclerescha las reproschas. La cumissiun da gestiun vuless alura er far recumandaziuns a la suprastanza da la citad Cuira.