A Claustra cumenzan oz las lavurs da construcziun per il nov edifizi per l'allevament da peschs da l'Uffizi da chatscha e pestga. L'edifizi vegl da l'onn 1924, ch'è vegnì cumplettà l'onn 1947 cun ina chasa da cuar e cun lajets, saja memia pitschen per il basegn da spazi d'ozendi, scriva il chantun en ina communicaziun.
Dapli plazza per l'allevament
Il nov stabiliment per l'allevament da peschs cumpiglia tranter auter in local per cuar, in local per pavlar ils peschs, ina halla cun in batschigl radund ed in local per la controlla da selvaschina. Sin il tetg vegn integrà in implant fotovoltaic cun ina prestaziun da circa 68'800 uras kilowatt per onn. Il cumplex vegn ad esser responsabel per la regiun Partenz, il Landwassertal e la Val d'Alvra.
La fin dal 2021 ha il Cussegl grond approvà il project cun in credit d'impegn da quatter milliuns francs. Las lavurs da construcziun vegnan ad esser terminadas tenor plan la stad 2024. En il Grischun datti en tut set stabiliments per l'allevament da peschs.
