A Claustra duai dar in nov center medicinal che dat suttetg a tschintg medis e medias da chasa. Sco la vischnanca ha communitgà vegn quel administrà da la Fundaziun Flury e duai esser pront sin l'entschatta settember.
Gia dapi onns datti gia ina mancanza da medis da chasa a Claustra. Per dar dumogn a quella problematica ha la vischnanca manà ils davos onn e mez in project da sanitaris, uschenumnà «Rapid Responders». Quest project duai esser a fin uschè spert ch'il nov center medicinal va en funcziun.
Per il center quinta la vischnanca da Claustra cun custs da radund 800'000 francs. Atgnamain avessan els gia avant sis onns vulì bajegiar in center da medis ed abitaziuns favuraivlas cun in servetsch d'accumpagnament. Quest project è dentant bloccà pervia d'in recurs e sa chatta per il mument anc tar il Tribunal federal.