Fin la stad resta la pendiculara da Gotschna ord funcziun. In donn vi da la suga che porta la cabina na pon ins betg reparar. Perquai sto la suga vegnir remplazzada. Producir e montar quella cuzza plirs mais, scrivan las pendicularas Tavau Claustra sin lur pagina d'internet.
Durant la controlla quotidiana ha il manader dal servetsch tecnic constatà il donn. Silsuenter haja el interrut immediatamain il manaschi. Osps ed autras persunas na sajan betg stadas en privel.
Be pli access da Tavau
Per arrivar en il territori da skis stat uss mo a disposiziun la funiculara da Parsenn, da Tavau ensi. La fin d'emna han ils territoris da skis organisà in bus da Claustra a Tavau.
Il donn economic saja grond, mintga di transportia la pendiculara 2'500 fin 5'000 persunas, uschia il manader da sectur pendicularas ed infrastructura Tavau Claustra Klaus May envers la gasettas da Somedia.
Pir la stad pon osps lura puspè duvrar la cabina, suenter che la suga è vegnida remplazzada.
