Nus entupain Dr. Ahoi las 11:30 avant l'Ospital chantunal dal Grischun. Oz fa Antonio Morano, il dretg num da Dr. Ahoi, ina visita a tut ils uffants ch'èn gist malsauns ubain blessads e ston perquai star en l'ospital. Dapi 23 onns è el clown da spital ed el emprova da crear muments bels, uschia ch'ils uffants emblidan per in curt mument lur dolur. Quai fa el tranter auter cun trics magics, borlas da savun e musica.
Adattà als basegns dal uffant decida Dr. Ahoi spontan tge ch'el fa sin sia visita. Visità vegnan tut ils uffants. Da la naschientscha prematura en l'incubatur fin il giuvenil che ha rut ses cumbel.
Jau port anc in pau rir, variaziun e fantasia en l'ospital d'uffants e visit regularmain uffants cun lur geniturs ed emprov da regalar ad els in bun mument.
Il nas cotschen ed auters accessoris
Sco ch'i tutga tar in dretg clown, ha era Dr. Ahoi in nas cotschen. Quai n'è dentant betg l'unic accessori dal clown da spital. Per visitar ils uffants, dovri anc in costum. Quel da Dr. Ahoi consista d'in tschop da medi, ina chapitscha da chapitani, chautschas blauas, in t-shirt blau-alv sdrimà e chalzers cotschen-blaus. Enturn il culiez porta il clown dad ospital in'ukulela e sin ses dies chattan ins satgados plain requisitas ch'el dovra per sias visitas. Suenter circa 20 minutas èsi uschè lunsch e Dr.Ahoi è pront per l'emprim uffant.
Visitar ils uffants
Dr. Ahoi entaupa ina mattatscha da quatter onns ch'è gist vi da giugar cun autos da termagl. Il mument che Sidney vesa il clown d'ospital, emblida ella tut ed ha mo pli egls per il clown e sia poppa da maun, Harry. Dr. Ahoi dumonda Sidney sch'ella vuless gidar a pavlar sia poppa da maun. Ditg e fatg: Sidney gida a dar las carottas e tomatas e giauda il temp.
In auter pazient sin la staziun d'uffants è Enzo. Ensemen cun l'agid dal «sal magic» po Enzo striunar davent tomatas or dal tschop da Dr. Ahoi. Lura sto el anc gidar al clown da metter si ils egliers da sulegl ed a la fin survegn el anc in pitschen regal, in purschè da fortuna ed ina carta d'autogram. La luna dal mattet è puspè meglra, e Dr. Ahoi va tar il proxim uffant.