Ina attatga da pliras starnidadas ina suenter l'autra – surtut a persunas cun in'allergia da pollen po quella situaziun vegnir avant enconuschenta. Sche quai capita durant ir cun auto po quai daventar privlus.
En mintga chas responsabel
Sch’ins sto starnidar u betg, l'automobilist ch'ha chaschunà la collisiun è responsabel, uschia l'expert d'assicuranzas Stefan Thurnherr envers SRF Espresso. E l'assicuranza da responsabladad obligatorica paja il donn vid l'auter auto. Quella sclerescha dentant era sch'i haja dà negligientscha greva, alura pudess l'assicuranza prender regress e pretender ch'ins paja sez 20 fin 30% dal donn. Quels cas sajan il bler en connex cun alcohol. D'in cas en connex cun starnidar n'ha Stefan Thurnherr anc mai udì.
Sch'ins ha starnidà u betg, l'automobilist che ha chaschunà la collisiun saja en mintga cas responsabel per l’accident, ins na saja betg impunibel pervia d'ina attatga da starnidar di Stéphanie Moser, advocata per dretg penal e dretg da transports.
Sin via sto l'automobilist u l'automobilista da tut temp pudair garantir la controlla dal vehichel.
I na dettia nagin scumond da manischar cura ch’ins haja attatgas da starnidar. Sch'ins sappia ch’ins haja fermamain la strucca da fain saja ina buna schliaziun da laschar manischar insatgi auter – i saja dentant cler, quai na saja nagina schliaziun adattada per il mintgadi.
Disturbis ed inattenziun
La pli gronda part dals accidents capita pervia da disturbis ed inattenziun – il pli savens pervia dad autras persunas en l'auto u il telefonin, quai di Mara Zenhäusern, pledadra da medias dal Post da consultaziun svizzer per la prevenziun d'accidents BFU. En media moran perquai mintg'onn radund 60 persunas. Starnidar tutga dentant en la categoria «tgira dal corp». En quella categoria tutga tut che meglierescha il bainstar corporal sco per exempel susdar, sa far giu il nas u starnidar. Pli pauc che 1% da tut ils accidents capitian or da quels motivs. Tenor in studi passentian automobilists ed automobilistas fin a 5% dal temp davos la roda da manar cun tgira dal corp.
Nus partin dal fatg ch'i na dat betg blers accidents pervia da starnidar.
