Per il Grischun ed il Forum economic dal Grischun hai quest'emna dà ina novitad negativa da Berna: Albert Rösti, il minister da traffic ha preschentà ils projects da traffic enfin l'onn 2045 – e nagin project dal Grischun è sin questa glista. Ni il tunnel da l'Isla Bella, ni il sviament a Bivio.
Il Forum economic dal Grischun ha diversas visiuns per il traffic – il pli impurtant saja tenor il mainagestiun Peder Plaz, da discutar tge ch'il Grischun vul. Tar il traffic dettia tenor il Forum economic numnadamain trais puncts da vista:
- Constatar ils problems tar il traffic, per exempel nua ch'i dat colonnas. Quai fan per gronda part la Confederaziun e las vischnancas.
- Guardar quant temp ch'i dovra per vegnir en lieus turistics. E far la dumonda, sch'ins vul insumma meglierar u accelerar il temp – quai rinforzass numnadamain il turissem dal di.
- Colliar il lieu da lavur cun il lieu d’abitar, pia pussibilitar da pendular. Sin quest punct sa focusescha il Forum economic dal Grischun e perquai sa tracta eir quest artitgel da questas visiuns.
Il chantun Grischun saja il chantun ch'è collià il pli mal en tut la Svizra. Il problem saja numnadamain che las distanzas sajan grondas ed uschia ins na sappia tenor Peder Plaz betg pendular tranter ils differents lieus nua ch'èn gronds martgads da lavur. Tar quests tutgian la Val dal Rain, Tavau e l'Engiadin'Ota. Ed era sche i dat regularas colliaziuns da tren na midia quai nagut vi da quai ch'i dovra bler temp.
Visiuns dal Forum economic
Ina da las differentas visiun dal Forum economic dal Grischun è il uschenumnà Alptrain – in grond project. Quai fiss in tunnel da tren davent da Cuira sur Lai e Tavo – lura vinavant in Engiadina sur San Murezzan e Malögia – e da là alura fin a Chiavenna. Quai è nagin project concret, mussa dentant la visiun da colliar regiuns. Ils custs importan enturn tschintg milliardas francs.
In auter project che avess tenor Peder Plaz da vegnir priorisà è ina colliaziun da tren directa da Cuira a Tusaun. Sche i funcziunass da far quest viadi pli spert ins pudess spargnar 15 minutas temp. Quai faschess ora bler per pendular alura vinavant da Tusaun en las differentas regiuns.
In’ulteriura visiun è ina colliaziun cun in tunnel per il tren tranter dus dals martgads da lavur principals – Tavau e l'Engiadin'Ota.
Cun tals projects na fiss il lieu d’abitar betg pli dependents dal lieu da lavur perquai che pendular funcziunass bain e na duvrass betg tant temp. Tals projects per colliar regiuns custassan dentant bler manegia Peder Plaz – el discurra da plirs tschient milliuns u perfin milliardas. Sper ils daners dovri bler temp per planisar, persvader e realisar – 20 enfin 30 onns. In project pli simpel e pli spert fissan pendicularas che collian vischnancas. Per exempel far ina pendiculara da la staziun da tren Tavanasa enfin si Breil. Quai prendess davent il traffic da Breil e faschess ordlonder in attractiv lieu per abitar, quai manegia Peder Plaz.
Sin ina scala d'in fin diesch quant realistics che quests projects èn oz, schess jau in... Sche nus manain ina discussiun rivain forsa sin sis da diesch.
Pervia da quai fissi impurtant che quests projects èn ussa sin maisa dal chantun e da las vischnancas. Perquai che sch'ins discurra oz betg davart da quests projects alura na vegnan els segir betg realisads ils proxims 30 onns. Alura ins discurra pir en 30 onns sur da quests, tge che vul dir ch'els vegnan forsa realisads en 60 onns. Peder Plaz senta ch'ina tscherta sceptica è enturn, era perquai ch'ins discurra da grondas summas da daners. La discussiun saja dentant da far.