Siglir tar il cuntegn

Header

audio
Lufs: Situaziun tendida en il Grischun – commentari
Or da Actualitad dals 23.12.2022. Maletg: RTR
laschar ir. Durada: 2 minutas 18 Secundas.
cuntegn

Commentari «Bun divertiment cun ils lufs»

Las cifras sur dals lufs da l'onn 2022  èn enconuschentas. I dat puspè dapli lufs, igl ha dà dubel uschè blers stgarps en cumparegliaziun cun l'onn passà ed igl è vegnì sajettà quest onn uschè blers lufs sco anc mai en il chantun Grischun.

Il fatg che las differentas gruppaziuns d'interess interpreteschan quels fatgs mo or da l'atgna vista e perquai ch'il tema vegn discutà fitg emoziunal enstagl en moda raziunala e constructiva, procura ch'i dat en il mument pertutgant il tema lufs mo perdents. Enstagl da discurrer in cun l'auter – vegni fatg renfatschas in a l'auter.

Uschia renfatschan ina part dals purs als collavuraturs da l'uffizi da chatscha ch'els fetschian nagut e guardan mo tiers – sco sche lezs savessan insatge persuenter, ch'il luf sto vegnir protegì tenor lescha.

Las organisaziuns per la protecziun da l'ambient e las partidas sanestras pretendan cun lur posiziun ideologica ina protecziun quasi totala dals lufs. Senza prender grond resguard sin purs e puras ch'èn il mument ils sulets direct pertutgads da las consequenzas negativas ch'ils lufs chaschunan. 

L'Uffizi da chatscha emprova da vegnir suenter tant sco pussaivel a las pretensiuns da l'agricultura, da las organisaziuns per la protecziun da l'ambient e da la Confederaziun. In pensum ch'è sco la quadratura dal rudè – nunpussaivla.

E la finala ha era il chau dal departament responsabel, Mario Cavigelli, procurà per irritaziuns. El n'ha questa stad betg pli vulì sa brischar la detta vi dals lufs ed ha perquai decidì da betg adina infurmar transparent. Era daco ch'il manader da l'uffizi da chatscha e pestga – ina persuna decisiva en il dossier lufs – è dapi dus mais scrit malsaun, n'ha Mario Cavigelli betg vulì respunder.

Da sperar resti che las differentas gruppas d'interess vegnan suenter passa 20 onns preschientscha dal luf plaunsieu da laschar da la vart las emoziuns e da cumenzar a chattar schliaziuns constructivas per tuts.

A la successura Carmelia Maissen che surpiglia il departament cun l'entschatta 2023 pon ins mo giavischar il medem sco ch'il manader da l'uffizi Georg Brosi aveva giavischà a ses successur cura ch'el aveva surdà ses uffizi, numnadamain: «Bun divertiment cun ils lufs».

Reto Pfister

Reto Pfister

Producent Surselva / GR Central

Avrir la boxa da profil Serrar la boxa da profil

Reto Pfister è producent e redactur per las regiuns Surselva e Grischun Central.

RTR actualitad 07:00

Artitgels legids il pli savens