Christoph Walter ha gia sunà sin las tribunas grondas da la Svizra: suenter esser sa preschentà tar «Art on Ice», ils «Swiss Awards» u tar la surdada dals Premis dal film svizzer è l'orchester da Christoph Walter daditg etablì en la scena da musica svizra.
Per in da ses dus concerts da Bumaun ha el quest onn tschernì la citad da Cuira – l'auter lieu è Schaffusa. Trais commembers grischuns dal chor dal Basel Tattoo sajan vegnids cun l'idea ed el saja sez gugent en il Grischun, sco il dirigent da 58 onns di. Uschia saja sa dà ch'il concert è a Cuira en la baselgia da Son Martin.
Per il concert da ses orchester ensemen cun il chor dal Basel Tattoo ed ils dus solists Nelly Patty e Rolf Romei haja el arranschà in program varià. I na dettia betg mo in stil da musica durant quella saira. I na saja betg ina saira da musica classica u da jazz u da gospel – i dettia era musica da film, musica tradiziunala e la chanzun enconuschenta rumantscha «La sera sper il lag». Quai malgrà che nagin dal chor discurria rumantsch.
Nus essan enconuschents ch'ins po avair tar nus il divertiment en tut las fassettas da la musica e quai en in unic concert. Tut las emoziuns che la musica po dar vinavant empruvain nus da dar vinavant – sche pussaivel cun bler sentiment.
Christoph Walter sez na dirigia betg mo l'orchester ed il chor durant il concert. El suna sez differents instruments sco l'accordeon u la trumbetta, el chanta e sauta cun la solista Nelly Patty – ch'è era sia dunna.
Il concert en la baselgia da Son Martin a Cuira
-
Bild 1 von 5. La baselgia da Son Martin amez Cuira. Bildquelle: RTR.
-
Bild 2 von 5. Christoph Walter na dirigia betg mo durant ses concerts, el suna er ils pli differents instruments, chanta e sauta schizunt cun sia dunna Nelly Patty. Bildquelle: RTR.
-
Bild 3 von 5. Nelly Patty chanta ina part da solo durant il concert. Ensemen cun Rolf Romei furman els dus il team da solists. Bildquelle: RTR.
-
Bild 4 von 5. Il dirigent da l'orchester: Christoph Walter. Bildquelle: MAD.
-
Bild 5 von 5. Standing ovations ed applaus per il concert da Bumaun a la fin da la saira. Bildquelle: RTR.
Suenter in'ura e mez program da musica cun tocs sco «An der schönen blauen Donau», «Celtic Crest», «Beauty and the Beast» u «My Way» va la saira a la fin cun in grond applaus e standing ovations.
Christoph Walter è fitg cuntent cun il concert e cun il public grischun, uschia ch'el vuless gugent turnar, sch'i sa dettia ina proxima pussaivladad.