La lavur, la mobiglia ch'ils e las emprendistas dal terz onn da scrinari fan è voluntaria. Savens haja quai da far cun ina dinamica en la classa, di il scolast dal fatg Riccardo Dasoli. Sch'in ubain dus da quels èn tips alfa e vulan far part, lura dat quai ina buna dinamica en la classa.
Igl è l'ambiziun dal scrinari, da far insatge nov, insatge per sa sez.
Il scolast manegia che quels ch'han fatg part da questa concurrenza possian esser fitg loschs e sentir emoziuns a la vernissascha.
Mobiglias or da lavuratoris da l'entir chantun
45 lavurs èn exponidas en l'aula da la scola professiunala artisanala a Cuira. La qualitad da quellas saja buna, di Riccardo Dasoli, gea schizunt megliera ch'ils onns passads. Ils emprendists derivan da tut il chantun. Uschia è era Lea Monn da Sumvitg arrivada cun sia mobiglia fatga per la stiva da ses geniturs. Ella haja gì grond plaschair da far questa lavur dad A fin Z, dentant saja era stà da morder in pau. Lea Monn è fitg cuntenta e loscha da sia lavur ed ha era mirveglias tge che ses collegas emprendistas manegian da sia lavur.