La conditoria Merz era gia mez viaden en la producziun da sias lieurs da Pasca cura che la Confederaziun ha annunzià il stadi extraordinari. Fin lura avevan els gia producì radund la mesadad da las lieurs planisadas .
Nus avain immediat chalà da producir lieurs. Ma las davosas duas emnas avain nus lura puspè dastgà producir ed uss essan nus sin 85% fin 90% da la normala producziun.
Reto Schmid da la pasternaria La Conditoria a Sedrun, ha cunzunt fatg quittà ch’i na dat per il mument nagin turissem ed uschia era nagins turists che vegnan a cumprar ina u l’autra spezialitad grischuna. Uschia ha er La Conditoria a Sedrun immediat chalà da producir lieurs da tschigulatta. La lieurs gia producidas èn vegnidas offridas en las medias socialas per 20% pli bunmartgà. Quai haja gì grond resun. Reto Schmid agiunta ch’els hajan uschia producì fin l'ultim di lieurs da tschigulatta e furnì quellas a clientella en l'entira Svizra.
La finala avain producì bun dubel uschè bleras lieurs sco l’onn passà.
Era la pasternaria Stgier a Casti, ch'ha quest onn per l’emprima giada producì sez las lieurs da Pasca, ha vendì in toc dapli che l’onn passà, sco il manader da fatschenta Claudio Stgier di.
Solidaritad u sa cuir insatge?
Per Reto Schmid èsi cler, la glieud less en da quels temps sustegnair fatschentas pitschnas ed indigenas e declera il grond interess vid sias lieurs cun solidaritad da la clientella.
Claudio Stgier percunter crai che la glieud haja uss dapli daners che restian pertge ch’els na giajan betg pli a baiver café u a mangiar en ustarias e lura veglian els sa cuir insatge bun cun cumprar ina pli chara lieur fatga a maun.
